«Pavlodar» ÁKK azyq-túlik baǵasyn turaqtandyrýǵa qabiletsiz bolyp shyqty
PAVLODAR. KAZINFORM - «Pavlodar» áleýmettik-kásipkerlik korporatsııasy» AQ-nyń jumysyna oblys bıliginiń kóńili tolmaı otyr. Aıtýlarynsha, kompanııanyń baǵany retteý boıynsha qabyldaǵan júıeleri álsiz.
Óńir basshysy Asaıyn Baıhanov «Pavlodar» áleýmettik-kásipkerlik korporatsııasynyń birqatar baǵyt boıynsha tómen nátıje kórsetip otyrǵanyna nazar aýdardy. ÁKK-niń basty mindetteriniń biri - áleýmettik mańyzy bar azyq-túlik ónimderiniń baǵasyn turaqtandyrý. Alaıda qazirgi ýaqytta qabyldanyp jatqan sharalardyń júıeli áseri baıqalmaı otyr.
- Azyq-túlik ónimderiniń baǵasyn turaqtandyrý boıynsha nátıje kútilgen. Ókinishke qaraı, búgin biz qabyldanyp jatqan sharalardyń júıeli áserin kórip otyrǵan joqpyz. Sonymen qatar men árbir baǵyt boıynsha tıimdiliktiń negizgi kórsetkishterin (KPI) anyqtaýdy tapsyrdym. Sonymen qatar qurylys merzimderin saqtaý máseleleri de bar. Merdigerlik uıymdardyń jumysyn baqylaýdyń álsizdigi jáne jumystardy oryndaý merzimderiniń saqtalmaýy kezdesedi. ÁKK tarapynan qurylys jobalarynyń iske asyrylýyna baqylaýdy kúsheıtýdi qajet, - dedi Asaıyn Baıhanov.
Korporatsııaǵa «Aýyl amanaty» baǵdarlamasy aıasynda byltyr 2,6 mıllıard teńge bólinip, onyń 1,8 mlrd teńgesi ıgerilgen. «Keń Dala 2» baǵdarlamasy boıynsha 10 mlrd teńge ıgerildi. Sondaı-aq, jyl ishinde ÁKK qatysýymen jalpy somasy 1,2 mlrd teńgege eki ınvestıtsııalyq joba iske asyryldy. Budan basqa, AÓK salasyna 4 mlrd teńgege nesıe berilgen.
Al óńirdiń turaqtandyrý qory 2,3 mlrd teńgeden astam somaǵa 11,1 myń tonna azyq-túlik qoryn quryp otyr. Azyq-túlik qaýipsizdigin qamtamasyz etý úshin óńirde 203 seriktes dúken jumys isteıdi.
Buǵan deıin Áleýmettik mańyzy bar azyq-túliktiń baǵa ındeksi qalaı ózgergeni týraly jazǵanbyz.