Pavlodar ákimi turǵyndardy qys mezgiline daıyn bolýǵa shaqyrdy
PAVLODAR. QazAqparat - Pavlodar oblysynyń ákimi Bolat Baqaýov óńirdiń ásirese, alys eldi-mekenderdiń turǵyndaryn alǵashqy sýyq túspeı qysqy mezgilge kómirmen qamdanyp alýǵa shaqyrdy, dep habarlaıdy pavlodarnews.kz.
Oblys ortalyǵyna kómirdi birneshe fırma jetkizedi. Ázirge qatty otyn úshin uzyn kezek joq. Tovarnyı kóshesi 25 mekenjaıynda «Elıt KZ» JShS kómirdiń birneshe túrin satýda. Jergilikti tanymal maıkóbelikten basqa bunda semeılik qarajyra jáne qaraǵandylyq shubarkól kómiri bar. Alystan ákelingender qymbat turady jáne sapasy da joǵary.
«Naryqta negizinen Maıkóbe ǵana bar. Alaıda, biz shubarkól kómirin de satamyz.
Sonymen qatar, 17 myń teńge turatyn kóp kúl qaldyratyn jáne joǵary jylý beretin qaraǵandylyq shubarkóldiń tonnasyn maıkóbeniń eki tonnasy almastyrady. Onyń quny 24 myń teńge. Biz synap kórýi úshin jarty qap shubarkól kómirin beremiz. Adamdar qaıta aınalyp otynnyń osy túrin satyp alýǵa keledi», - dedi jaýapkershiligi shekteýli seriktestik dırektory Dastan Dáýletbaev.
Dastan Dáletbaevtyń aıtýynsha, semeılik qarajyrany kásiporyn az alady.
«Bul kómir kóp kúıe shyǵaryp, tútindikti bitep tastaıdy. Úıge tútin kirgen jaǵdaılar boldy. Alaıda, sapasy boıynsha maıkóbeden jaqsyraq. Ázirge aýaraıy qatty otyndy kóp mólsherde daıyndaýǵa múmkindik bermeı otyr. Birde kún shyǵyp, birde jańbyr jaýyp kómir úgitiledi de sapasy tómendeıdi. Qazirgi kezde «Elıt KZ» JShS-de 3300 tonna shubarkól, 50 tonna maıkóbe bar», - dedi kásiporyn jetekshisi.
Oblys ákimi satyp alýshylardyń joqtyǵyna qarap tańdandy.
«Kólikter kórinbeıdi, adamdar áli erte dep oılap otyr ma? Qysqy daıyndyqtyń maýsymy baıaǵyda bastalǵan. Jaqsy úı ıesi kómirmen qamdanyp úlgerdi. Biz artyq salmaq tasıtyn júk kólikterine qatań shara qoldandyq. Endi jetkizýshiler baǵany ósirý úshin salmaqqa baılanysty shekteýdiń qoıylǵanyn paıdalanatyn bolady. Oblysymyzdyń barlyq turǵyndaryn, ásire alys eldi-mekenderde turatyndardy bul máselemen aınalysýǵa shaqyramyn. Uzyn-sonar kezek paıda bolmaı turyp, kenishtegi kómir baǵasy óspeı turyp úlgerý qajet, - dedi Bolat Baqaýov.
Qazir Pavlodarda jeke satýshylar maıkóbeniń tonnalyq baǵasyn 10-12 myń teńgege belgilep otyr. Onyń baǵasy qashyqtyqqa da baılanysty. Kenishte tonnasy 7500 teńgemen jiberilýde.
Óńirde jylytý maýsymy 17 qyrkúıekten bastalady.
