Pavlodar ákimi soǵys ardagerlerine páter syılady
«Bizdiń oblysta barlyǵy 72 Ekinshi dúnıejúzilik soǵysynyń ardageri turady. Biz olardyń barlyǵynyń úılerin aralap, maıdangerlerdiń qalaı ómir súrip jatqanyn kórdik. Óńirde óz baspanasy bolǵanymen, memleketten páter alýǵa quqyǵy bar ardagerler bar ekeni anyqtaldy. Bizdiń oblysta osyndaı ardagerlerdiń sany úsheý bolyp shyqty jáne olarǵa páter berý týraly sheshim qabyldadyq», - dep atap ótti aımaq basshysy.
Ardagerler 9 mamyr kúni sherýge kelgisi keledi. Olardyń eshqaısysy 92-93 jastamyn dep sezinbeıdi. Sonymen qatar, Ertis óńirinde 101 jasqa tolǵan úsh soǵys ardageri turady. Olardyń barlyǵy bizdiń elimizge turaqtylyq, gúldený tileıdi jáne Elbasyna alǵystaryn bildirýde. Ákimbek Ábdiraıymov jaqynda 95 jasqa toldy.
Ol 1942 jyly Kalının maıdanyna Belorýssııanyń Vıtebsk jáne Smolensk oblystarynyń aýmaǵynda 60-shy Avtomatty polkiniń 204-shi atqyshtar dıvızııasy quramynda, sodan keıin Ýkraına aýmaǵynda soǵysty. Maıdanda kóptegen jaralanýlardan keıin múgedektik aldy. Ardagerdiń 2 dárejeli Otan soǵysy ordeni, Qyzyl juldyz Ordeni, «Germanııany jeńgeni úshin» medali, Marshal Jýkov medali jáne mereıtoılyq medaldary sııaqty marapattary bar.
Soǵys ardageri Qudaıbergen Qapsalıamov Pavlodar oblysynda dúnıege kelgen. Maıdanǵa 17 jastaǵy jasóspirim kezinde ketip, 34-shi jeke joıǵysh-tankke qarsy dıvızıonda artıllerıst-kózdeýshi bolyp qyzmet etken. Ardagerdiń keýdesinde úshinshi dárejeli Dańq ordeni, «Varshavany azat etkeni úshin», «Jaýyngerlik eńbegi úshin» medaldary, sondaı-aq mereıtoılyq marapattary jarqyrap tur. 1950 jyldyń maýsym aıynda áskerden bosatylǵannan keıin Qudaıbergen Kapsalıamov týǵan aýylyna oralyp, ishki ister organdarynda qyzmet etken. Eńbek jetistikteri úshin «Minsiz qyzmeti úshin» medalimen jáne «Mılıtsııa úzdigi» tósbelgisimen marapattalǵan. Vıacheslav Vladımırovıch Chernyshev 1944 jyly áskerge shaqyryldy. Ol birinshi Belarýs maıdanynda, 26 gvardııalyq atqyshtar polkinde, 76 gvardııalyq atqyshtar dıvızııasynda soǵysty. 1945 jyldyń qańtarynda jeńil jaraqat alǵan. 1953 jyly KSRO Qarýly Kúshteriniń qysqarýyna baılanysty zapasqa shyǵarylyp, sodan keıin ásker aldyndaǵy qyzmetpen aınalysty. Ekinshi dárejeli Otan soǵysy Ordenimen, «Germanııany jeńgeni úshin», «Berlındi alǵany úshin» medaldarymen jáne mereıtoılyq nagradalarmen marapattalǵan.
« Vıacheslav Vladımırovıch eshqashan páter suramady jáne maǵan da tyıym saldy, mine búgin biz úshin osyndaı jaǵymdy tosyn syı boldy. Ókinishke oraı, ulymyzdy joǵaltyp aldyq. Qazir nemerelerdiń páterinde ómir súrip jatyrmyz. Olar qazir Saratov, Ýlıanovsk jáne Omby qalalarynda turady, - deıdi ardagerdiń jubaıy Tatıana Ivanovna Chernysheva.
Oblys ákimi óńirde turǵyn úıge muqtaj birde-bir maıdanger qalmaǵanyn atap ótti. Sonymen qatar, bıyl ekinshi dúnıejúzilik soǵysyna qatysýshylarǵa jeńis kúnine oraı tólemder 500 myń teńgege deıin ósti.
