Pavlodar ákimi Qytaıda ınvestor izdep júr
ASTANA. QazAqparat - Óńir basshysy bastaǵan Pavlodar oblysynyń delegatsııasy jumys saparymen Qytaı Halyq Respýblıkasynda júr, dep habarlaıdy pavlodarnews.kz.
Pavlodar oblysy ákiminiń baspasóz qyzmeti taratqan aqparatqa súıensek, bul sapardyń basty maqsaty - halyqaralyq yntymaqtastyqqa ınvestıtsııa tartý. Resmı sapardyń alǵashqy kúni pavlodarlyq delegatsııa Qytaı elindegi eń iri kásiporyndardyń biri - YEMA korporatsııasynyń ókilderimen kezdesti.
«YEMA GROUP CO., LTD» Úrimshide joǵary tehnologııalardy damytý jáne meńgerý óndiristik aımaǵynda ornalasqan. Korporatsııanyń jarǵylyq kapıtaly 150 mıllıon qytaı ıýanyn quraıdy. YEMA 20 jyldyń ishinde syrtqy ekonomıkamen, qarjy ınstıtýttarymen, mádenı týrızmmen jáne salaaralyq qyzmetpen aınalysatyn kompanııaǵa aınalǵan.
Bul kásiporyn «Basty kásiporyn», Sıntszıan bank konsortsıýmynyń «Nesıe boıynsha adal kásiporny» jáne «Partııalyq qurylys pen sharýashylyq boıynsha myqty kásiporyn» ataqtaryna ıe bolǵan.
Qazirgi tańda korporatsııanyń syrtqy saýda-ekonomıkalyq platformasy segiz enshiles fırmasy bar. Negizgi saýda júrgiziletin seriktes memleketter Ortalyq Azııa men Reseı bolyp esepteledi. YEMA basshysy Chen Gan atap ótkendeı, búgingi tańda Qytaı men Qazaqstan arasynda shekaranyń bes ýchaskesi ashyq, sondyqtan memleketter arasyndaǵy qarym-qatynasty rettep, ınvestıtsııa salý úshin eshbir kedergi joq.
«Basynda biz sizderge iri qytaı kompanııalarymen baılanys jáne aýylsharýashylyǵy salasynda yntamaqtastyq ornatý úshin kópir retinde qyzmet etýge daıynbyz. Sizderdiń ónimderińiz ekologııalyq turǵydan eń taza bolyp esepteledi. Al, bizge bul óte qajet. Sonymen qatar, Qytaıda satýǵa bolatyn bıtým shyǵarasyzdar», - dedi Chen Gan.
Bolat Baqaýov qabyldaýshy tarapqa alǵys bildirip, búgingi kúni Pavlodar oblysynda qytaı kompanııalary munaı óńdeý zaýyttarynda qurylyspen aınalysatynyn atap ótti.
«Biz sizderdi ózimizde ınvestor retinde kórgimiz keledi. Pavlodarda áleýmettik-ekonomıkalyq aımaq bar. Sol jerde ınvestorlarǵa jaqsy múmkindikter usynylady. Sizderdi sol jerde kútemiz jáne kez kelgen qoldaý kórsetýge daıynbyz. Tıip-qashyp jumys isteý óte aýyr. Sondyqtan sizderge ne kerek ekenin jáne bizden qandaı kómek bolatynyn anyqtaý kerek. Sizderdiń Qytaı boıynsha baılanystaryńyz nyǵaıǵan. Kompanııalaryńyz bizdiń oblysqa basqa ınvestorlardy tartýǵa kómektesedi degen úmittemiz. Pavlodarlyq delegatsııa budan keıin Shansı provıntsııasynda aýyl sharýashylyǵy ónimderi boıynsha Qytaı kórmesiniń besinshi sessııasynda bolady dep kútilýde», - dedi óńir basshysy.
