Pavlodar ákimdigi az qamtylǵan otbasylarǵa kómir jetkizýde
PAVLODAR. QazAqparat - Pavlodar qalasynda 134 otbasyǵa kómek retinde kómir jetkizilýde, dep habarlaıdy pavlodarnews.kz.
Qalalyq kásipkerlik jáne aýyl sharýashylyǵy bóliminiń sektor jetekshisi Ádil Isın ár otbasyǵa 2 tonna kómir jetkiziletinin atap ótti.
«Qazirgi ýaqytta qalalyq ákimdik az qamtylǵan, qıyn jaǵdaıǵa tap bolǵan jáne áleýmettik álsiz sanattaǵy otbasylarǵa kómek kórsetýde. Bizdiń tizimdegi 134 otbasyǵa 2 tonna kóleminde kómir beriledi»,- dedi ol.
Otbasylar qalalyq ákimdikke, jumyspen qamtý jáne áleýmettik baǵdarlamalar bólimine kelip júgingen. Sondaı-aq ákimniń, orynbasarlarynyń qabyldaýyna kelip, ótinish bildirgen. Túsken ótinishterdiń qorytyndysy boıynsha tizim jasalady. Bul – jyl saıyn ótkiziletin shara.
Ádil Isınniń aıtýynsha, kómir demeýshilerdiń qarajatyna alynǵan. «Avest» JShS óz esebinen kómirdi ár otbasyǵa jetkizýde. Búgin kómir alǵandardyń qatarynda jumyssyz retinde tirkelgen Sábıra Baıazıt ta bar.
«Maýsym aıynan bastap jer úıdi jalǵa alyp turyp jatyrmyz. Otbasymyzda jubaıym men 2 balam bar. Ataýly áleýmettik kómek alyp turamyz. Kómir beriletinin estip, Krıvenko 25 mekenjaıyna baryp, ótinish bildirdim. Ózderi habarlasyp, ákelip berip jatyr»,- dedi Sábıra Baıazıt.
Aıta keteıik, Pavlodar qalasynda az qamtylǵan, qıyn jaǵdaıǵa tap bolǵan jáne áleýmettik álsiz sanattaǵy otbasylarda 41 myńnan astam adam bar.