«Pavlodar» AEA-da kaýstık soda óndirisiniń kólemi arttyrylmaq
ASTANA. QazAqparat - «Pavlodar» arnaıy ekonomıkalyq aýmaǵyn damytýdyń keleshegi týraly «Samuryq-Qazyna» qory tóraǵasynyń orynbasary Alık Aıdarbaev issaparmen kelgen kezde talqylandy, dep habarlaıdy pavlodarnews.kz.
Ulttyq ál-aýqat qory tóraǵasynyń orynbasary men Pavlodar oblysynyń ákimi bastap kelgen delegatsııa Ekibastuz GRES-1 jáne GRES-2, qazandyq shyǵaratyn «Energospetsstroı» JShS, qyzanaq óndiretin «Greenhouse KZ» JShS-nde boldy. Pavlodarda Alık Aıdarbaev «Neftehım LTD» JShS men arnaıy ekonomıkalyq aýmaqty aralady.
Bul jerde «Kaýstık» AQ-da ekinshi kezekte qýattylyǵy 40 myń tonna ónimdi quraıtyn qurylysty iske qosý josparlanyp otyrǵany belgili boldy. Nátıjesinde joba el naryǵyn júz paıyz kaýstık sodasymen qamtamasyz etýge múmkindik beredi.
Al, «AgroHımProgress» JShS glıfosat shyǵarýdy kózdep otyr. Osyǵan uqsas jobalar Jabyl oblysynda da júzege asyrý oıda bolǵan, degenmen olardyń quny pavlodarlyq kásipkerler usynǵan jobadan anaǵurlym joǵary. Máselen, jańa hımııalyq zaýyttyń qurylysy 150-200 mıllıon dollarǵa shyqsa, «Kaýstık» AQ-nyń ekinshi kezeńin iske qosý 30 mıllıon dollar turady. Glıfosat týraly aıtatyn bolsaq, atalmysh gerbıtsıdti óndiretin kásiporyndy nólden bastap salý elimizdiń ońtústik óńirinde 150 mıllıon dollarǵa baǵalanǵan.
Al, «AgroHımProgress» JShS-ndegi ınfraqurylymnyń bar ekenin eskersek, bul óndiristi 20 mıllıon dollarǵa júzege asyrýǵa bolady. Oblys ákimdiginde ótken jıynda óńir basshysy Bolat Baqaýov arnaıy ekonomıkalyq aýmaqta hımııa men munaı hımııa ǵana emes, alıýmınıı klasterin de damytý josparlanyp otyrǵanyn aıtty. - 2025 jyly AEA-da ınvestıtsııa kólemi 150 mıllıard teńgeni jáne bastapqy alıýmınıı tutyný 150 myń tonnany quraıtyn 20 kásiporyndy iske qosý josparlanyp otyr, - dedi oblys ákimi.
«Bıylǵy jyly polıaktardyń «Grýppa Ketı» kompanııasy alıýmınıı profılderin shyǵaratyn jobalardyń jumysyn bastaıdy. Investıtsııa kólemi 28 mıllıard teńgeni, bastapqy alıýmınııdi óńdirý 60 myń tonnany quraıdy. Budan basqa, óńir basshysy búgingi tańda «Pavlodar» arnaıy ekonomıkalyq aýmaǵy Qazaqstan boıynsha 1 bıýdjettik teńgege 14 teńge ınvestıtsııa tartatyn eń sátti jobalardyń biri ekenin jetkizdi. Bul rette AEA-da 17% ınjenerlik kommýnıkatsııa tartylǵan, sondyqtan Bolat Baqaýov «Samuryq-Qazyna» qorynyń ókilderinen ınfraqurylym qurylysyn qarjylandyrýǵa yqpal etýdi surady.
