Pavel Kýkın: Shyǵys Qazaqstanda jeńil atletıka turalap qaldy deýge esh negiz joq
ÓSKEMEN. QazAqparat – Óskemen qalasyndaǵy Olga Rypakova atyndaǵy jeńil atletıka manejindegi bapker Pavel Kýkın QazAqparat tilshisine óńirde jeńil atletıkanyń qalaı damyp jatqanyn aıtyp berdi.
«O.Rypakova atyndaǵy jeńil atletıka manejinde bapker bolyp eńbek etip júrgenime 8 jyldaı boldy. Osy ýaqyt kóleminde jastardy bul sport túrine baýlyp, kórgen-bilgenimdi úıretip kelemin. Jalpy óńirimizde jeńil atletıka jaqsy qarqynmen damyp kele jatyr deýge bolady. Jerlesimiz Olımpıada chempıony atanǵannan keıin oblysta osy baǵytqa kóp kóńil bóline bastady», - deıdi Pavel Kýkın.
Onyń aıtýynsha, aımaqta sportshylardy daıyndaýǵa múmkindik beretin jaqsy baza qalyptasqan. Manejde jeńil atletter qajetti jattyǵýlardyń barlyǵyn jasaı alady.
«Endi bir ashyq alańda stadıon bolsa deımiz. Qazir qaladaǵy «Shyǵys» stadıonynda rekonstrýktsııalaý jumystary júrgizilip jatyr. Bári oıdaǵydaı bolsa, sol jaqta jattyǵýǵa múmkindik alsaq dep otyrmyz. Sondaı-aq oblysta jasóspirimder sportyna erekshe nazar aýdarylǵan. Bolashaǵynan zor úmit kúttiretin jas sportshylarymyz respýblıkalyq, azııalyq básekelerde bıik shyńdardan kórinip júr. Sondyqtan Shyǵys Qazaqstanda jeńil atletıka turalap qaldy deýge esh negiz joq», - deıdi bapker.
Óskemendegi jeńil atletıka manejinde 600-ge jýyq bala jattyǵady. Alaıda koronavırýs pandemııasy bastalǵaly beri olardyń sany birshama azaıyp ketken.
«Úıirmege 9-10 jastaǵy balalar qabyldanady. Bapkerler olardy sabaq kestelerine sáıkes birneshe topqa bólip daıyndaıdy. Al boıynda erekshe qabileti barlardy jáne jaqsy nátıje kórsetkenderdi bólek iriktep, jeke daıyndyq kestesin quramyz», - dedi Pavel Kýkın.
