Pavel Dýrovtyń soty bir jyldan erte ótpeıdi — Frantsııa prokýratýrasy

ASTANA. KAZINFORM — Frantsııa prokýratýrasynyń ókili qandaı da bir kelisim týraly aıtýǵa áli erte ekenin aıtty, dep jazady Wired.

Basylym atap ótkendeı, Pavel Dýrovty qamaýǵa alýmen aıaqtalǵan is ótken qysta bir tergeýden bastalǵan.

Tergeýshilerdiń sózinshe, bul Telegram-da kámeletke tolmaǵan qyzdardy qýdalaǵan kúdiktiniń jeke basyn anyqtaý operatsııasy boldy. Sondaı-aq ol platformada jas qyzdy zorlaǵanyn moıyndady.

Tergeýshiler Telegram-nan kúdiktiniń málimetterin suratqan kezde kompanııa bas tartty, dep habarlaıdy Politico.eu.

Prokýratýra ókili Meılıs De Rek Wired basylymyna kúdiktini anyqtaýǵa kómektesý úshin tergeýshilerdiń Telegram-ǵa habarlasqanyn rastady. Sonymen qatar ol kompanııanyń basqa quqyq qorǵaý organdarynyń ótinishterine de jaýap bermegenin atap ótti.

— Eger bul bir ǵana oqıǵa bolsa, biz Telegram týraly eshteńe oılamas edik, — dep túsindirdi De Rek. — Biraq másele, bul ár ýaqytta, ár elde qaıtalanyp turǵanynda.

Libération málimetinshe, bir ǵana frantsýz jandarmerııasy 2013-2024 jyldar aralyǵynda Telegram-da jaýapsyz qalǵan 2460 jaǵdaıdy tirkegen.

Meılıs de Rek WIRED-ke onyń komandasy Telegram jaýap bermegendikten ártúrli vedomstvolarda qansha tergeý júrip jatqanyn túsingennen keıin, qamaýǵa alý týraly sheshim qabyldanǵanyn aıtty.

De Rek Frantsııadaǵy sot protsesi kem degende bir jyl ishinde bastalmaıtynyn alǵa tartty. Onyń aıtýynsha, yqtımal kelisim týraly aıtý áli erte. Qazirgi ýaqytta Dýrov Frantsııada.

Pavel Dýrov 24 tamyzda Parıjdegi Le Býrje áýejaıynda balalarǵa qarsy qylmysqa, esirtki saýdasyna jáne alaıaqtyqqa qatysy bar degen aıyppen qamaýǵa alyndy.

Oǵan 12 túrli aıyp taǵylǵany anyqtaldy.