Pavel Dýrov Telegram Frantsııadaǵy narazylyq quralyna aınalǵanyn maqtan tutatynyn aıtty

ASTANA. KAZINFORM — Telegram arnasynyń negizin qalaýshy Pavel Dýrov óz ónimi «Makronnyń sátsiz saıasatyna qarsy quralǵa» aınalǵany úshin maqtanatynyn aıtty, dep jazdy Anadoly agenttigi.

— Segiz jyl umyt bolǵan halyq bos pıar-kampanııalar men kózboıaýshylyqtan sharshady — endi olar jaýap berip jatyr, — dep jazdy Pavel Dýrov amerıkalyq X kompanııasynyń áleýmettik jelisinde.

2024 jyldyń 24 tamyzynda Dýrov Parıjdegi Le-Býrje áýejaıynda birneshe aıyp boıynsha, sonyń ishinde qylmystyq top quramynda zańsyz qarjylyq operatsııalar jasaý maqsatynda onlaın platformany basqarýǵa qatysy bar degen kúdikpen ustaldy.

Artynsha Telegram Pavel Dýrovtyń ustalýyna baılanysty málimdeme jasaǵan edi. Onda «Telegram Eýropa Odaǵynyń zańdaryn, sonyń ishinde Tsıfrlyq qyzmetter týraly zańdy qatań saqtaıdy — onyń moderatsııasy salalyq standarttarǵa sáıkes keledi jáne únemi jetildirilip otyrady. Telegram basshysy Pavel Dýrovtyń elden jasyratyn eshteńesi joq jáne ol Eýropada jıi saıahattaıdy. Platformany teris maqsatta paıdalanǵandar úshin osy jeli nemese onyń ıesi jaýapty deý — absýrd», — dep jazǵan edi.

Osy tusta Pavel Dýrovqa 12 túrli aıyp taǵylǵany belgili boldy.

Al Pavel Dýrov bolsa óziniń tutqyndalýy týraly «Bul Frantsııa polıtsııasynyń qateligi» degen ýájin aıtqan edi.