Pavel Dýrov Telegram-nyń App Store-dan óshirilýine qatysty pikir bildirdi
ASTANA. KAZINFORM – Apple 4 tamyzǵa qaraǵan túni Telegram messendjerin App Store dúkeninen alyp tastady. Kompanııa muny balalardy jynystyq qanaýǵa qatysty materıaldardyń anyqtalýymen túsindirdi, dep habarlaıdy Anadolu agenttigi.
Telegram-nyń negizin qalaýshylardyń biri Pavel Dýrov messendjerdiń óshirilýine «bopsalaýshylardyń» áreketi sebep bolǵanyn málimdedi.
Apple ókilderiniń aıtýynsha, tyıym salynǵan materıal taratqan paıdalanýshy anyqtalǵannan keıin Telegram ákimshiligine habar berilip, onyń akkaýnty dereý buǵattalǵan.
Óz kezeginde Pavel Dýrov quqyq buzýshynyń jarııa chattaǵy eski habarlamalardy óńdeý ádisin paıdalanǵanyn túsindirdi. Onyń aıtýynsha, mátin jasandy ıntellekt kómegimen ózgertilgen zańsyz kontentke aýystyrylǵan. Mundaı materıaldar chattyń qarapaıym qatysýshylaryna kórinbegendikten, olar ádettegi shaǵym tetikteri arqyly habarlaı almaǵan.
– Bopsalaýshylar avtomattandyrylǵan akkaýnttar arqyly ashyq toptarǵa zańsyz kontent ornalastyryp, keıin bul týraly Apple-ge tikeleı habarlaıdy. Osylaısha olar aqsha tóleýden bas tartqan qaýymdastyqtardy japtyrýǵa tyrysady, – dedi Dýrov.
Onyń sózinshe, Telegram-daǵy ashyq chattar men arnalardaǵy zańsyz pornografııalyq kontent júıeli másele emes. Dýrov messendjerdegi moderatsııanyń tıimdi jumys isteıtinin, al qaskóılerdiń eski kontent pen tehnıkalyq aıla-tásilderdi qoldanýy sonyń dáleli ekenin atap ótti.
Aıta keteıik, buǵan deıin Pavel Dýrov Qazaqstanda ótetin IOAI-2026 jeńimpazdaryna NFT-marapattaryn beretinin jazdyq.
Al ótken aıdyń sońynda Reseı Dýrovqa izdeý jarııalaǵan edi.
