Pavel Dýrov: Telegram-dy turaqty qoldanýshylardyń sany 1 mıllıardtan asty
ASTANA. KAZINFORM - Telegram-nyń aı saıynǵy aýdıtorııasy 1 mıllıard belsendi qoldanýshydan asty. Bul týraly messendjerdiń negizin qalaýshy Pavel Dýrov málimdedi.
Onyń aıtýynsha, Telegram álemdegi eń tanymal habar almasý qosymshalarynyń arasynda ekinshi orynǵa kóterildi (qytaılyq WeChat-tan keıin).
Telegram-nyń aldynda WhatsApp jelisi tur, Dýrov ony óz messendjeriniń «arzan» jáne «taıaz» elikteýshisi dep ataǵan.
- Olar jyldar boıy bizdi baıaýlatý úshin lobbı jáne PR naýqandaryna mıllıardtaǵan aqsha jumsady jáne bizdiń jańalyqtarymyzdy kóshirýge tyrysty. Olar sátsizdikke ushyrady. Telegram ósti, tabysty boldy jáne bizdiń básekelesimizden aıyrmashylyǵy, óziniń táýelsizdigin saqtap qaldy. Biz endi ǵana bastap jatyrmyz, - dep jazdy Dýrov.
Dýrov sonymen qatar paıdalanýshylar belsendiligi artyp kele jatqanyn habarlady. Ol ár qoldanýshy Telegram-dy kúnine orta eseppen 21 ret ashyp, oǵan kúnine 41 mınýt jumsaıtynyn atap ótti. Dýrovtyń aıtýynsha, 2024 jyly tabys 547 mıllıon dollar boldy.
2024 jyldyń sáýirinde Dýrov amerıkalyq jýrnalıst Taker Karlsonǵa bergen suhbatynda Telegram-dy paıdalanýshylar bir jyldyń ishinde mıllıardqa jetetinin aıtqan edi. Ol sondaı-aq jeltoqsanda Telegram-nyń bir jyldaǵy jalpy tabysy 1 mıllıard dollardan asqanyn jazǵan. Onyń aıtýynsha, 2022 jyly paıda bolǵan Telegram Premium aqyly qyzmetine jazylýshylardyń sany 12 mıllıonnan asty.
Eske sala keteıik, Pavel Dýrov Frantsııadan Dýbaıǵa oralǵanyn aıtty.