Pavel Dýrov Qytaıdyń JI damytýda nelikten Batysty basyp ozatynyn túsindirdi

ASTANA. KAZINFORM — Telegram negizin qalaýshy Pavel Dýrov AQSh-tyń orta bilim berý júıesi túbegeıli ózgeristerge ushyramaıynsha, Qytaıdyń ósip kele jatqan tehnologııalyq ústemdigi sózsiz bolatynyn málimdedi.

— Qytaılyq DeepSeek startapynyń tabysynan keıin kópshilik Qytaıdyń JI salasynda AQSh-ty qanshalyqty tez qýyp jetkenine tańqaldy. Alaıda Qytaıdyń algorıtmdik tıimdiliktegi jetistikteri kútpegen jerden paıda bolǵan joq. Qytaılyq mektep oqýshylary halyqaralyq olımpıadalarda matematıka men baǵdarlamalaýdan burynnan ozyq boldy, — dep jazdy Pavel Dýrov óziniń Telegram arnasynda.

Onyń pikirinshe, Qytaıdyń orta bilim berý júıesi, ásirese naqty ǵylymdar boıynsha mamandardy daıyndaýy batysqa qaraǵanda joǵary.

— Ol (Qytaıdyń bilim berý júıesi) oqýshylar arasyndaǵy qatal básekeni yntalandyrady. Bul joǵary tıimdi keńestik úlgiden alynǵan qaǵıda, — dedi Telegram negizin qalaýshy.

Batys mektepteri balalardy qysym men mazaq etýden qorǵaý úshin básekelestikten aýlaq bolǵanymen, bul eń jaqsy oqýshylardy yntalandyrýdy qoıady.

— Jeńilgenderdi joıý arqyly siz jeńimpazdardy joıasyz, — dep sanaıdy ol.

Dýrov kóptegen oqýshy mektepti básekelester arasynda birinshi oryn alýǵa umtylatyn jarys retinde qabyldaıtynyna senimdi. Oqý úlgerimindegi ashyqtyqtyń bolmaýy ambıtsııaly jasóspirimder úshin oqýdy maǵynasyz etedi. Aqyry daryndy balalar kóbinese beıne oıyndardy tartymdy dep sanaıdy, óıtkeni olar kem degende árbir oıynshynyń reıtıngin kórsetedi.

— Árbir oqýshyǵa qanshalyqty nátıje kórsetse de, chempıon ekenin aıtý meıirimdi bolyp kórinýi múmkin, biraq shyndyq oqý bitirgennen keıin bul ıllıýzııany tez joıady. Shyndyqtyń izgi nıetti mektep saıasatynan aıyrmashylyǵy — sportta, bızneste, ǵylymda nemese tehnologııada óziniń qoǵamdyq baǵalary men reıtıngteri bar, — dep jazdy Dýrov.

Eske sala ketsek, Nvidia qytaılyq chat-bot kesirinen shamamen 600 mlrd dollar joǵaltqany anyqtaldy.