Pavel Dýrov Astanada startapshylar baıqaýynda qazylyq etti
ASTANA. KAZINFORM — Elordada Eýrazııadaǵy iri startap baıqaýy — Astana Hub Battle 2025 fınaly bastaldy. Ádil qazy alqasynda QR Premer-Mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev, Telegram negizin qalaýshy Pavel Dýrov jáne basqa da sarapshylar bar.
Bıyl forýmda Qazaqstan, Ózbekstan, Ázerbaıjan jáne basqa elderden kelgen 80 startap ózderiniń ınnovatsııalyq jobalaryn tanystyrdy. Ár startapqa óz jobasyn tanystyrý úshin bir mınýt ýaqyt berilgen, osy ýaqytta olar jobalarynyń ereksheligin, múmkindikterin jáne masshtabtaýǵa daıyn ekendigin kórsetýge tıis.
Nátıjesinde 14 startap tańdalyp, forýmnyń basty alańynda basty júlde qory — 125 000 AQSh dollaryn utyp alý úshin jarysqa túsip otyr.
Fınalıster arasynda avtoturaqtar men ınfraqurylymdy ońtaılandyratyn, bilim salasynda emtıhannyń ádil ótýin qadaǵalaıtyn, sondaı-aq, shaǵyn jáne orta bıznes táýlik boıy jumys isteıtin, ınsýltten keıingi ońaltý úshin qoldyń qozǵalystaryn veb-kamera arqyly baqylap, terapevtıkalyq oıyndar negizinde jumys isteıtin jańa staptaptar bar.
Sondaı-aq, sport pen reabılıtatsııa úshin jasandy ıntellekt pen óz energııa kózderi negizinde jumys isteıtin kıiletin sensorlar, qurylys jáne ınjenerııa salasyndaǵy protsesterdi avtomattandyratyn JI-agentter, oqýshylardyń kásibı baǵdarlanýyn jáne psıhologııalyq qoldaýyn qamtamasyz etetin jańa bastamalar tanystyrylyp jatyr.
Eske sala keteıik, Digital Bridge Prezıdent Qasym-Jomart Toqaevtyń qatysýymen ótetin Ortalyq Azııadaǵy eń iri tehnologııalyq forým. Bıylǵy forýmnyń basty taqyryby — Generative Nation. Bul uǵym Qazaqstannyń tehnologııalar men adam kapıtalynyń damýyna negizdelgen bilim qoǵamyn qurýdaǵy negizgi baǵytyn kórsetedi.
Budan buryn Pavel Dýrov Alem.ai ǵımaratynda jasandy ıntellekt salasyndaǵy arnaıy zerthanasyn ashty.
EKSPO kórmesine salynǵan «Nur álem» pavılonynyń ornynda ALEM.AI alǵashqy JI ortalyǵy ashyldy. Onda Telegram, Presight, ıAndeks kompanııalarynyń JI boıynsha zerthanalary men ókildikteri ashylmaq.
Sonymen birge, Qazaqstanda JI-terapevt pen feldsherdi qorǵaıtyn vıdeojeton jasaldy.