Pavel Dýrov Qazaqstanda ótetin IOAI-2026 jeńimpazdaryna NFT-marapattar bermek
ASTANA. KAZINFORM – Pavel Dýrov Jasandy ıntellekt boıynsha halyqaralyq olımpıada (IOAI 2026) jeńimpazdary úshin arnaıy NFT-marapattar taǵaıyndady. Bul týraly Qazaqstannyń sporttyq baǵdarlamalaý federatsııasynyń prezıdenti Baǵdat Mýsın málimdedi.
– Osydan eki jyl buryn Prezıdent qoldaýymen Astana álemdegi eń bedeldi baǵdarlamalaý jarystarynyń biri – Grand TBC World Finals týrnırin qabyldady. Búgin biz sol joldy jalǵastyryp otyrmyz. Bul olımpıada – Prezıdent saıasatynyń, sondaı-aq Qazaqstannyń tsıfrlyq memleket qurýǵa jáne jańa býynǵa ınvestıtsııa salýǵa degen berik ustanymynyń aıqyn kórinisi. Al búgin sol jańa býyn osy zalda bas qosyp otyr. Álemniń 106 elinen kelgen 400-den astam daryndy jas ózara baq synaýǵa jınaldy, – dedi Baǵdat Mýsın.
Onyń aıtýynsha, olımpıadanyń qundylyǵy onyń aýqymynda emes. Onyń basty qundylyǵy – dál osy jerde otyrǵan jas talanttar.
– Sizder ártúrli mádenıet pen ortadan keldińizder. Biraq barshańyzdy bir maqsat biriktiredi, ol – adamdardyń ómirin jaqsartatyn tehnologııalar jasaý. Men sizderdiń árqaısyńyz jasandy ıntellektiniń keleshegin aıqyndaıtyn bolashaq tehnologııalyq kóshbasshylar ekenderińizge shyn júrekten senemin. Búginde álemge tanymal kóptegen tehnologııalyq kompanııalardy sizder sııaqty olımpıadalyq ortadan shyqqan adamdar qurǵan. Bálkim, kelesi iri jasandy ıntellekt kompanııasynyń negizin qalaýshy dál qazir osy zalda otyrǵan shyǵar, – dedi federatsııa basshysy.
Halyqaralyq baǵdarlamalaý federatsııasy memleket, ǵylym jáne bıznes ókilderimen birlesip, Prezıdenttiń AI SANA baǵdarlamasy aıasynda oqýshylar men túrli sala mamandaryna jasandy ıntellekt negizderin úıretip, JI dáýirine daıyn Qazaqstandy qalyptastyryp keledi.
– Sóz sońynda taǵy bir jańalyqpen bóliskim keledi. Bizdiń dosymyz Pavel Dýrov búgin aramyzǵa kele almaǵanymen, IOAI olımpıadasynyń qatysýshylaryn qoldaǵysy keldi. Sondyqtan ol olımpıada jeńimpazdary úshin arnaıy 214 eksklıýzıv syılyq ázirledi. Árbir júldeger osyndaı erekshe marapatqa ıe bolady. Pavel Dýrov bul syılyqtardyń ómir boıyna saqtalatynyn atap ótti. Al olardyń biregeıligi men shekteýli sany ýaqyt óte kele qunyn odan ári arttyrýy múmkin, – dedi Baǵdat Mýsın.
Júldegerlerge biregeı tsıfrlyq kýboktar tabystalady. Telegram kompanııasy bul marapattardy belgili bir eń tómengi baǵamen keri satyp alýǵa kepildik beredi. Bul – jasandy ıntellekt salasyndaǵy daryndy jastardy qoldaýǵa baǵyttalǵan bastama.
Aıta keteıik, Astanada ótip jatqan JI olımpıadasyna 106 eldiń komandasy jınaldy.
Buǵan deıin B. Mýsın IOAI-2026 olımpıadasy bolashaq tehnologııalyq kóshbasshylar men kásipkerlerdi tárbıeleýge yqpal etetinin aıtqan edi.
