Pavel Dýrov Frantsııadan Dýbaıǵa ushyp ketti

ASTANA. KAZINFORM - Ózine qatysty bastalǵan tergeýge baılanysty sot baqylaýyna alynyp, Frantsııada turyp jatqan Telegram negizin qalaýshy Pavel Dýrov Frantsııadan ketti, dep habarlaıdy reseılik TASS.

Bul týraly Agence France-Presse (AFP) osy iske jaqyn úsh derekkózge silteme jasap habarlady.

Frantsııadan ketýge osy eldiń sot organdary ruqsat bergen.

Derekkózderdiń biriniń habarlaýynsha, tergeýshi sýdıalardyń biri Dýrovtyń sot qadaǵalaýyn alyp tastaý týraly ótinishin qanaǵattandyryp, birneshe aptaǵa Frantsııadan shyǵýǵa ruqsat bergen. Taǵy bir derekkóz Dýrov mingen ushaqtyń senbi kúni Le-Býrje áýejaıynan ushyp shyqqanyn habarlady.

Aıta keteıik, ótken jyldyń 24 tamyzy kúni Dýrov Parıjdiń Le-Býrje áýejaıynda ustaldy.

28 tamyz kúni onyń aldyn ala ustaý sharasy aıaqtalyp, kásipker sotqa jiberildi. Onda sot tergeýshisi Dýrovqa uıymdasqan qylmystyq top quramynda zańsyz tranzaktsııalardy júzege asyrý úshin jelilik platformany ákimshilendirý isine qatysýdy qosa alǵanda 6 bap boıynsha aıyp taqty.

Mundaı áreket úshin Parıj prokýratýrasynyń málimdeýinshe, 500 myń eýro aıyppul salynyp, 10 jylǵa sottalady.

Tergeý sýdıasynyń sheshimi boıynsha kásipker kepildikke 5 mln eýro tólep, sot qadaǵalaýyna alyndy. Sonymen qatar oǵan aptasyna eki ret polıtsııa bólimshesine kelip turý mindettelip, Frantsııa aımaǵynan shyǵýǵa tyıym salyndy.

Dýrov isi boıynsha sot protsesi bir jyldan erte bastalmaıdy, dep habarlady prokýratýra ókili Meılıs De Rek.