Pavel Dýrov Digital Bridge-2025 forýmyna qatysý úshin Astanaǵa keledi
ASTANA. KAZINFORM — Telegram messendjeriniń negizin qalaýshy ári SEO-sy Pavel Dýrov 2025 jylǵy 2 qazanda Astanada ótetin Digital Bridge forýmynyń plenarlyq otyrysynda sóz sóıleıdi. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev áleýmettik jelidegi paraqshasynda habarlady.
Sol kúni Memleket basshysy Qasym-Jomart Toqaevtyń qatysýymen Alem.ai halyqaralyq jasandy ıntellekt ortalyǵynyń ashylýy josparlanǵan.
Forýmnyń basty sessııasynda álemdik tehnologııa ındýstrııasynyń spıkerleri qatysady: BAÁ-niń jasandy ıntellekt, tsıfrlyq ekonomıka jáne qashyqtan jumys isteý jónindegi memlekettik mınıstri Omar Sultan ál-Olama, Sinovation Ventures kompanııasynyń negizin qalaýshy jáne bas dırektory Kaı-Fý Lı, Stenford ýnıversıtetiniń professory Ilıa Strebýlaev, Google kompanııasynyń zertteýler jónindegi dırektory, Stenford ýnıversıtetiniń ǵylymı qyzmetkeri Pıter Norvıg.
Sessııa moderatory — Solana Foundation prezıdenti Lılı Lıý.
Forým aıasynda úzdik AI-jobalardyń pıtch-sessııasy ótedi.
Fınalǵa shyqqandar tórt sanat boıynsha, sonyń ishinde mektep oqýshylary, kolledjder men joǵary oqý oryndarynyń stýdentteri, startap-komandalar óz ázirlemelerin halyqaralyq sarapshylarǵa, ınvestorlarǵa jáne memlekettik organdar ókilderine tanystyrady.
Іs-shara Qazaqstannyń Generative Nation tujyrymdamasy aıasyndaǵy áleýetin kórsetiýge baǵyttalǵan.
Eske sala keteıik, buǵan deıin Enbek.kz portalynda jasandy ıntellekt 50 myńnan astam bos jumys ornyn usynǵany habarlanǵan edi.