Pavel Dýrov astanalyq startapshy týraly: Odan sheberlik sabaǵyn alatyn sııaqtymyn
ASTANA. KAZINFORM — Telegram jelisiniń negizin qalaýshy Pavel Dýrov Astanada startapshylar baıqaýynda qazylyq etti jáne jeńimpaz astanalyqty marapattap, onyń qabiletterin erekshe atap ótti.
— Men búgin kórgen nárselerden qatty áser aldym. Nátıjeler tamasha! Ókinishke qaraı, barlyǵy jeńiske jetip, júlde ala almady. Biraq biz jeńiske óte jaqyn bolǵan kóptegen startapty kórdik jáne olardyń bolashaqta tabysqa jetetinine úmittenemin. Áserimnen bólek, búgin estigen jáne kórgen keıbir ıdeıa meni shabyttandyrdy, jáne bári sátti bolady dep senemin — dedi Pavel Dýrov.
Sonymen birge, P. Dýrov jeńimpaz startapshy týraly jyly lebiz aıtyp, tipti odan sheberlik sabaǵyn alý keregin jetkizdi. Astanalyq Nurálı Sarbaqysh bilim salasynda emtıhannyń ádil ótýin qadaǵalaıtyn TrustExam jobasyn usynǵan edi.
— Nege men osy jigitke júlde berýdi sheshtim? Onyń prezentatsııa jasaý qabileti keremet, óte jaqsy sóz sóıledi, tipti ózime odan sheberlik sabaǵyn alý kerek sııaqty. Jáne taǵy bir nárse — men sizdiń startapyńyzdyń syrtqy ınvestıtsııaǵa muqtaj emestigin túsinemin. Bul durys jol dep oılaımyn, sebebi men de syrtqy ınvestıtsııa tartqan joqpyn, Telegram 100% óz menshigimde. Bul táýelsizdikti bildiredi. Táýelsizdik sizdiń komandańyzǵa óz biregeıligin saqtap, ári qaraı geometrııalyq qarqynmen ósýge múmkindik beredi. Árqashan osylaı jalǵastyra berińiz, — dedi Pavel Dýrov astanalyq startapshyǵa.
Aıta keteıik, Digital Bridge-2025 halyqaralyq forýmynda Astana Hub Battle startap baıqaýy ótti. Onda Qazaqstan, Ózbekstan, Ázerbaıjan jáne basqa elderden kelgen 80 startap ózderiniń ınnovatsııalyq jobalaryn tanystyrdy. Nátıjesinde alty úzdik komanda marapattalyp, 25 myń AQSh dollary berildi.