Pavel Dýrov artynda qalatyn murasyn 100-den astam balasyna teń bólip bermekshi

ASTANA. KAZINFORM — 40 jastaǵy Pavel Dýrov ózinen keıin alty resmı balasy men donorlyq uryq arqyly dúnıege kelgen qalǵan balalary mura úshin bir-birimen jaýlasqanyn qalamaıdy. Sol úshin baılyǵyn teń bóletinin málimdedi, dep jazdy Euronews.

Telegram messendjeriniń negizin qalaýshy ári jalǵyz ıesi sanalatyn reseılik tehnologııalyq kásipker Pavel Dýrov óziniń mıllıardtaǵan dollarlyq baılyǵyn 100-den astam balasynyń arasynda teń bólip berýdi josparlap otyrǵanyn aıtty. Bul týraly ol frantsýzdyń Le Point jýrnalyna bergen suhbatynda baıandaǵan.

– Men qaıtys bolǵannan keıin olar bir-birimen qyryq pyshaq bolyp qyrlyspasyn deımin, – dedi Dýrov.

Onyń aıtýynsha, donorlyq uryq arqyly 12 elde 100-den astam bala dúnıege kelgen, al taǵy altaýy – úsh túrli áıelden týǵan resmı moıyndalǵan balalar.

Dýrovtyń aıtýynsha, eshbir balasy 30 jyl boıy mura ala almaıdy. Ol muny balalardyń óz ómirin ózi quryp, táýelsiz tulǵa bolyp qalyptasýy úshin jasap otyrǵanyn jetkizdi.

– Men olardyń qarapaıym adamdar sekildi ómir súrgenin, óz jolyn ózi tapqanyn, senimdi bolýyn jáne shyǵarmashylyqpen aınalysqanyn qalaımyn. Olar banktegi esepshotqa qarap ómir súrmeýi tıis, – dedi ol.

Mıllıarder jýyrda óz ósıetin jazyp bitirgenin de aıtty. Bul qadamǵa ne sebepti barǵanyn túsindirip:

– Bostandyqty qorǵaý – ózińe jaý tabýdyń eń jyldam joly. Onyń ishinde kúshti memleketterde», – dedi Dýrov.

Qazir Dýbaıda turatyn 40 jastaǵy mıllıarder ótken jyly Frantsııada ustalǵan. Oǵan Telegram platformasynda qylmyspen kúreste jetkilikti shara qoldanbady degen aıyp taǵylǵan. Dýrov bul aıyptaýlardy birneshe ret joqqa shyǵaryp, olardy «absýrd» dep atady.

– Qylmyskerler bizdiń messendjerdi basqalarmen qatar qoldanǵany úshin bizdi de qylmysker deýge bolmaıdy, – dep málimdedi ol.

Eske sala ketsek, Dýrov negizin qalaǵan Telegram qosymshasyn 2013 jyly iske qosqan. Búginde onyń aı saıynǵy belsendi paıdalanýshylary 1 mıllıardtan asady.

Jaqynda Frantsııa bıligi Pavel Dýrovtyń elden shyǵý shekteýlerin jeńildetti.