Patsıenttiń shabýylynan zardap shekken Qostanaı aýrýhanasynyń dárigeri Astanaǵa jetkizildi
ASTANA. KAZINFORM – Qabyldaý bólmesinde patsıenttiń shabýylynan zardap shekken Qostanaı oblystyq aýrýhanasynyń dárigeri búgin respýblıkalyq deńgeıdegi mamandardy tarta otyryp, medıtsınalyq kómek kórsetý úshin sanıavıatsııa bortymen Astanadaǵy Ulttyq shuǵyl medıtsınany úılestirý ortalyǵyna jetkizildi.
Densaýlyq saqtaý mınıstrligi málimetinshe, ýrologııa bólimshesiniń hırýrgi Anton Kıstanov kúrdeli operatsııa aıaqtalǵannan keıin naýqastardy qabyldaýdy jalǵastyrý úshin aýrýhananyń qabyldaý bólmesine tústi.
Bólimshedegi patsıenttiń biri shabýyl jasap, dárigerdi soqqyǵa jyqty, nátıjesinde dáriger esinen tanyp qaldy. Dáriger reanımatsııaǵa kelesi dıagnozdarmen emdeýge jatqyzyldy: mıdyń aýyr dárejedegi soǵylýy, mıǵa jiti qan quıylý, bas súıeginiń jabyq synýy.
Mamandardyń konsılıýmynyń qorytyndysy boıynsha zardap shegýshini Ulttyq shuǵyl medıtsınany úılestirý ortalyǵyna tasymaldaý týraly sheshim qabyldandy, onda ol odan ári mamandandyrylǵan em alady.
– Medıtsına qyzmetkerlerine qatysty zorlyq-zombylyq jaǵdaılarynyń jıileýine baılanysty Densaýlyq saqtaý mınıstrligi Іshki ister mınıstrligimen birlesip, ýrgenttik statsıonarlardyń, balalar jáne perınataldyq ortalyqtardyń qabyldaý bólmelerinde táýlik boıy polıtsııa prsttaryn tezdetip qamtamasyz etý týraly sheshim qabyldady, - dep habarlady búgin áleýmettik jelide Densaýlyq saqtaý mınıstri Aqmaral Álnazarova.
Ol qyrkúıek aıynda Parlamentke medıtsına qyzmetkerlerine jasalǵan shabýyldar úshin jaýapkershilikti kúsheıtý týraly zańnamalyq ózgerister engiziletinin eske saldy.
Jumys oryndarynda dárigerlerdiń qaýipsizdigin kúsheıtý úshin medıtsınalyq mekemelerdi beınebaqylaýmen, kúzetpen, dabyl túımelerimen, jedel járdem brıgadalaryn – beınejetondarmen jaraqtandyrý josparlanyp otyr.
Qostanaıda naýqastyń shabýylynan zardap shekken dárigerdiń aty-jóni belgili bolǵan edi.