Patsha otbasynyń hattary aýktsıonda 390 myń dollarǵa satyldy
ASTANA. 8 jeltoqsan. QazAqparat - Romanovtar patsha otbasynyń 2 myń jeke hattary, jedelhattary, ashyqhattary, sýretteri jáne fotosýretteri Jenevadaǵy aýktsıonda 385 myń shveıtsar frankine (390 myń dollar) satyldy, dep habarlady reseılik «Jańalyqtar» agenttigi.
Bul aýktsıonǵa shyǵarylǵan patsha otbasy hattarynyń eń mol jınaǵy bolatyn. Imperator Aleksandr ІІІ-shi men patshaıym Marııa Fedorovnanyń balalary, orystyń sońǵy patshasy Nıkolaı ІІ-niń aǵa-apalary, uly kinázder jáne kináz-hanymdar Georgıı, Mıhaıl, Ksenııa jáne Olga revolıýtsııaǵa deıin de jáne odan keıin de 1887 jyldan 1944 jylǵa deıin ózderiniń shveıtsarlyq muǵalimi, tálimgeri jáne keńesshisi Ferdınand Tormeıermen (1858-1944) hat jazysyp turǵan. Ol Jeneva túbindegi Karýja qalasynda turdy.
Jenevanyń Aýktsıon úıiniń dırektory Bernar Pıgeniń aıtýynsha, satý qorytyndysy oılaǵandaǵydan asyp tústi. «Biz satylym nátıjesine razymyz. Romanovtar rýhyna, bul otbasynyń taǵdyryna beı-jaı qaramaıtyndar áli de bolsa bar eken», - dedi Pıge. Al Romanovtar otbasynyń urpaqtary aýktsıonǵa qatysqan joq.
