Patrýldik polıtsııa qyzmetkerlerin aldap soqqan aqtóbelik ómir boıyna kólik júrgize almaıdy

Oqıǵa bıyl mamyr aıynda boldy. Aıyptaý aktisine súıensek, sottalýshy buǵan deıin de mas kúıinde kólik júrgizgeni úshin 7 jylǵa kýáliginen aıyrylǵan. Soǵan qaramastan týysqanynyń kóligin alyp, taǵy da mas kúıinde rýlge otyrǵan. Túnde patrýldik polıtsııa qyzmetkerleri toqtatyp, qujatyn suraǵan kezde bólesiniń saqtandyrý polısin usynady. Al polıtsııa qyzmetkerleri osy qujatty alyp, saraptamadan ótkizedi, ákimshilik hattama toltyrady.

- Maǵan 1414 nómirinen habarlama keldi. Meniń ústimnen ákimshilik is qozǵalǵan eken. Mán-jaıdy bilý úshin polıtsııa basqarmasyna bardym. Olar meni patrýldik polıtsııa qyzmetine jiberdi. Onda ákimshilik is qozǵalǵanyn, qazir ózimniń tergeý ızolıatorynda otyrǵanymdy aıtty. Al men ol jaqta emes, polıtsııanyń bólimde turmyn. Tústen keıin kelýdi suraǵan soń ketip bara jattym. Biraq polıtsııa qyzmetkeri meni qýyp jetip, sot otyrysy júrip jatqanyn aıtty. Vıdeo arqyly meniń fotomdy, keıin bólemdi kórsetti. Sol kúni rýlde bolǵan men emes, bólem. Al hattama meniń atyma toltyrylyp, polıtsııa meni qamaýǵa aldym dep oılaǵan,- dedi kýáger Serik.

Sot otyrysyna patrýldik polıtsııa qyzmetkerleri de qatysyp, kýálik etti. Olar Serik esimdi adamnyń fotosynda uqsastyq bolǵanyn, naqty sol adam dep oılaǵanyn aıtty. Tek saqtandyrý polısin alyp, saraptamaǵa aparady. Al qalǵan qujattaryn elektrondy túrde ortaq bazadan shyǵaryp alǵan. Osy jaýapsyzdyǵy úshin polıtsııa qyzmetkeriniń biri qatań sógis, ekinshisi qyzmetine tolyq saı emes eskertýin alǵan. Sot-medıtsınalyq saraptama kezinde bótenniń qujatyn usynǵan júrgizýshiniń jeńil dárejede mas bolǵany anyqtaldy.

- Sot otyrysy kezinde sottalýshy ózine taǵylǵan aıypty moıyndamady. Soǵan qaramastan onyń kinási sot qujattarymen dáleldendi. Polıtsııa, medıtsına qyzmetkerleri kýágerlik etti. Sottalýshy mas kúıinde bolǵan, qorytyndy bar. Sonymen birge vıdeo dálel boldy. Aıyptaý tarapy is durys saralandy dep sanaıdy. Sottalýshyny aıypty dep tanyp, Qylmystyq kodekstiń 346-baby 1-bóligimen 2 jylǵa bas bostandyǵynan aıyrýdy suraımyn. Jazasyn óteý ornyn qaýipsizdigi tómen júzetý mekemesi dep belgilensin,- dedi prokýror.

Aqtóbe qalalyq №2 soty baspasóz qyzmetiniń habarlaýynsha, sot úkimimen sottalýshy Qylmystyq kodekstiń 356-baby 1-bóligimen aıypty dep tanylyp, 6 aıǵa bas bostandyǵynan aıyryldy. Sonymen birge ómir boıyna kólik júrgizý quqyǵynan aıyryldy. Sot úkimi zańdy kúshine engen joq.

Eske salsaq, Áleýmettik jelide kóp qaralym men lúpil jınamaq bolǵan aqtóbelik júrgizýshi qamaldy. Ol qalanyń bas dańǵylyndaǵy júrginshiler jolynda kóligimen júrgen.