Patrýldik jáne jol polıtsııasy qyzmetkerleriniń birlesken jumysy 1 qarashadan bastalmaq - QR ІІM
ASTANA. 27 qyrkúıek. QazAqparat - QR Іshki ister mınıstrliginde mınıstrdiń orynbasary Erlan Turgymbaevtyń tóraǵalyq etýimen Astana, Almaty qalalarynyń jáne oblystardyń ІІD bastyqtarynyń orynbasarlarynyń, Ákimshilik jáne Jol polıtsııasy basqarmalary basshylarynyń qatysýymen jedel keńes ótkizildi, onda qoǵamdyq tártipti saqtaý jáne jol qaýipsizdigi boıynsha máseleler qarastyryldy, dep habarlaıdy vedomstvonyń baspasóz qyzmetinen.
Kórsetilgen keńeste Ákimshilik jáne Jol polıtsııasy bólinisterin biriktirý máselesi de qarastyryldy.
Keńeste qazirgi ýaqytta mınıstrlikte Ákimshilik jáne Jol polıtsııasy komıtetterin qaıta qurý tolyqtaı ótkizilgeni atap kórsetildi.
Jergilikti jerlerde jol-patrýldik polıtsııasy qyzmetin uıymdastyrý úshin patrýldik polıtsııanyń da, jol polıtsııasynyń da qyzmetin reglamentteıtin normatıvtik-quqyqtyq aktilerge, sondaı-aq qyzmetkerge qoıylatyn biliktilik talaptarǵa túzetýler engizildi.
Úlgi qurylym men úlgi shtattar, sondaı-aq tıisti jadynamalar ázirlendi, olar qyzmettik jumysta qoldaný úshin aýmaqtyq ІІO-ǵa joldandy.
Sonymen qatar, keýde belgisiniń, jeńdegi shevronnyń jańa úlgi dızaındary jáne patrýldik avtomobılderdiń aqparattyq jazýlary ázirlenip, bekitildi, jańa nysandyq kıim-keshekti ázirleý boıynsha jumys júrgizilýde.
ІІD basshylaryna patrýldik jáne jol polıtsııasy qyzmetkerleriniń birlesken taǵylymdamasy praktıkasyn jalǵastyrý, tıisti sanattaǵy júrgizýshi kýálikteri joq patrýldik polıtsııanyń jeke quramyn oqytýdy aıaqtaý, bos oryndardy jasaqtaýdy qamtamasyz etý, sondaı-aq jergilikti atqarýshy organdarmen patrýldik avtomashınalardy beıne- tirkegishtermen jabdyqtaý týraly máseleni pysyqtaý tapsyryldy.
Keńes qorytyndysy boıynsha mınıstrlik aǵymdaǵy jylǵy 1 qarashadan bastap birlesken bólinisterdiń jumysyn bastaýǵa sheshim qabyldady.
