Patrýldik polıtseılerge sýdan qutqaratyn jabdyqtar taratylýda
QR Іshki ister mınıstri Erlan Turǵymbaevtyń nusqaýyna sáıkes sý qoımalary mańynda kezekshilik atqaratyn polıtsııanyń mashına ekıpajdary budan bylaı sýda qutqarý kerek-jaraqtarymen jabdyqtalatyn bolady.
SQO Polıtsııa departamentiniń baspasóz qyzmetinen málim etkendeı, óńirdiń patrýldik polıtseılerine jańa jabdyqtar tabys etildi. Endi jekelegen patrýldik mashınalarda beıindi qural-saımandardan: apattyq belgi, órtke qarsy kenep mata, alkotester, temir kesetin qaıshy, sondaı-aq sýdan qutqaratyn dóńgelek, eki kókirekshe, arqan bolady.
«Batalonnyń, basqa da bólinisterdiń qyzmetkerleri kez kelgen jaǵdaıda adamdarǵa kómekke kelýge ázir ekendikterin birneshe márte dáleldedi. Muz astyna ketken adamdardy eki ret alyp shyqqan polıtsııa starshınasy Rýslan Qydyrmınniń erlik isi kópshiliktiń esinde. Al, 2016 jylǵy jazdyń basynda sýyq sýǵa qulaǵan stýdentti - túnde, qamys arasynan patrýldik polıtsııanyń tórt qyzmetkeri izdegeni esimizde. Sol sebepti, bul jabdyqtar bizdiń qyzmetkerlerge qajet», - dedi SQO PD Jergilikti polıtsııa qyzmeti basqarmasynyń PPB komandıri Erlan Mádıev.
Bul jańashyldyq ózen-kólderi kóp SQO úshin, ásirese shomylý maýsymynda ózekti. Polıtseıler qutqarýshylarmen birge jaǵajaılarda birlesken reıdterdi júrgizedi, sondaı-aq belgilenbegen oryndarda sýǵa túsetindermen túsindirý jumystaryn ótkizedi. Jańa jıyntyqtardy ázirge tek joldardy patrýldeıtin oblystyq batalonnyń qyzmetkerleri ǵana aldy.
SQO PD bastyǵy Marat Tólebaevtyń tapsyrmasy boıynsha jańa qural-jabdyqtarmen aldaǵy ýaqytta sý mańynda kezekshilik atqaratyn qalalyq bólinistiń mashınalary da jabdyqtalady.
