Patrondy saqtaǵany úshin sottalǵan azamatqa qatysty is toqtatyldy
ASTANA. KAZINFORM — Elorda turǵynynyń sómkesinen áýejaıdaǵy tekserý kezinde bir patron tabylyp, ol oq-dárini zańsyz saqtaǵany jáne tasymaldaǵany úshin sottalǵan edi. Alaıda kassatsııalyq sot onyń áreketi qoǵamǵa eleýli qaýip tóndirmegenin atap ótip, qylmystyq quqyq buzýshylyq quramy bolmaǵandyqtan isti toqtatty. Bul týraly Bas prokýratýra málim etti.
Elordada shyǵarmashylyq salamen aınalysatyn 22 jastaǵy jas jigit salynyp jatqan jeńil relsti kólik júıesi ǵımaratynyń janynan bir patron taýyp alyp, ony sómkesine salyp qoıǵan.
— Ol bul zatty túsirilimge arnalǵan rekvızıt retinde paıdalanbaqshy bolǵan, alaıda keıin ony umytyp ketken. Bir jyldan keıin jigit Almatyǵa ushý úshin áýejaıǵa kelgen. Tekserý kezinde patron onyń sómkesiniń qaltasynan tabylǵan. Sot ony oq-dárini zańsyz ıemdengeni, saqtaǵany jáne tasymaldaǵany úshin 1 jylǵa bas bostandyǵyn shekteýge sottaǵan, — dep habarlady prokýratýradan.
Іs boıynsha jas jigittiń patrondy maqsaty boıynsha paıdalanbaq bolǵany ne ony basqa adamdarǵa bermek bolǵany nemese ótkizbekshi bolǵany anyqtalmaǵan. Odan qarý tabylmaǵan, eshqandaı zııandy saldar týyndamaǵan.
— QK-niń 10-babyna sáıkes formaldy túrde qylmystyq quqyq buzýshylyq belgileri bar, biraq mańyzy jaǵynan bolmashy, qoǵamǵa qaýip tóndirmeıtin áreket qylmystyq quqyqbuzýshylyq bolyp tanylmaıdy, — delingen habarlamada.
Kassatsııalyq sot árekettiń qoǵamǵa eleýli qaýip tóndirmegendikten, isti qylmystyq quqyq buzýshylyq quramynyń bolmaýyna baılanysty toqtatty.
Sot eshkimge zııan kelmegenin, bir ǵana patron tabylǵanyn jáne ony qylmystyq maqsatta paıdalanbaq bolǵany dáleldenbegenin eskerdi.
Bas prokýratýra kassatsııalyq sottyń ustanymymen kelisti.
Aıta keteıik, qarttardy aldaǵan alaıaq 4 jyl 7 aıǵa sottaldy.
