Patronat tárbıeshiler qyzmetiniń tólemaqysy kóbeıedi

ASTANA. QazAqparat - QR Oqý-aǵartý mınıstrligi Balalardyń quqyqtaryn qorǵaý komıtetiniń bastamasymen bıylǵy maýsym aıynan bastap patronat tárbıeshilerdiń qyzmetterine tólenetin tólemaqy artty. Buryn olardyń qyzmetterine tólenetin aqy 60 myń teńge bolsa, endi áleýmettik aýdarymdardy qosa eseptegende ol 35 aılyq eseptik kórsetkishke artty, ıaǵnı 120 myń teńge shamasynda alady, dep habarlaıdy QazAqparat.

Komıtet tóraıymy Nasymjan Ospanovanyń aıtýynsha, jetim balalar men ata-anasynyń qamqorlyǵynsyz qalǵan balalardyń otbasylyq qurylymy memlekettik saıasattyń basym baǵyttarynyń biri. Patronat tárbıeshilerdiń qyzmetterine tólenetin tólemaqy mólsherin arttyrý birqatar nátıjelerge qol jetkizýge múmkindik beredi.

«Bizdiń oıymyzsha, patronat tárbıeshilerdiń qyzmetterine tólenetin aqyny arttyrý osy otbasylarda tárbıelenetin balalardyń ómir súrý deńgeıin jaqsartady», – deıdi Balalardyń quqyqtaryn qorǵaý komıtetiniń tóraıymy Nasymjan Ospanova.

Búginde elimizde otbasylyq ornalastyrýdyń 4 balama túri bar: bala asyrap alý, qorǵanshylyq (qamqorshylyq), patronat jáne qabyldaýshy otbasy.

Aıta keteıik, ınternat uıymdarynda 3 myńnan astam jetim jáne ata-anasynyń qamqorlyǵynsyz qalǵan bala tárbıelenip jatyr. Sońǵy 10 jylda balalar úıiniń sany 2,5 esege, al ondaǵy tárbıelenýshiler sany 3 ese azaıǵan. Buǵan ınternat uıymdaryn denstıtýtsıonalızatsııalaý, otbasylyq ornalastyrýdyń balama nysandaryn engizý jáne jetim balalardy tárbıelep otyrǵan otbasylardy materıaldyq qoldaý saıasaty áser etti.

Bul baǵyttaǵy bastamalardy ári qaraı da tıimdi júzege asyrý úshin mınıstrlik Patronattyq tárbıe týraly erejege ózgerister engizip, nátıjesinde patronat tárbıeshilerdiń qyzmetterine tólenetin aqyny kóbeıtý zańnama turǵysynda retteldi.