Patrısııa Kaas pen Jerar Deparde kollektsııasynda qazaqstandyq sýretshiler týyndysy bar
ASTANA. KAZINFORM — Frantsýz juldyzdary Patrısııa Kaas pen Jerar Depardeniń jeke kollektsııasynda Ábilhan Qasteev, Aısha Ǵalymbaeva jáne Alpysbaı Qazyǵulovtyń jumystary bar. Bul týraly QR Mádenıet jáne aqparat mınıstrligi mádenıet komıteti Kazinform agenttiginiń resmı suraýyna bergen jaýabynda habarlady.
«Internet pen áleýmettik jelilerdegi aqparatqa sáıkes, Patrısııa Kaastyń jeke kollektsııasynda qazaq halqynyń tabıǵaty men ómiriniń sulýlyǵyn beıneleıtin shynaıy peızajdary men portretterimen tanymal qazaqstandyq uly sýretshilerdiń biri Ábilhan Qasteev, qazaq kınosynyń alǵashqy kásibı sýretshisi Aısha Ǵalymbaeva jáne basqa tanymal qazaqstandyq sýretshilerdiń jumystary bar», — dep jaýap berdi mádenıet komıteti.
Sondaı-aq, Ábilhan Qasteev atyndaǵy Memlekettik óner murajaıynyń aqparatynsha qazaqstandyq sýretshilerdiń týyndylaryna sheteldik art-naryqta suranys bar. Ásirese Alpysbaı Qazǵulovtyń shyǵarmalaryn izdeıtinder kóp.
Mysaly, «Keńistiktegi oıyn» eńbegi Patrısııa Kaastyń jeke kollektsııasynda saqtaýly tur, al «Uly Jibek joly» kartınasy Jerar Deparde kollektsııasynan oryn alǵan.
Derbes derekter jáne olardy qorǵaý týraly zańǵa sáıkes, kartınalardyń quny kommertsııalyq qupııa sanalady.
Buǵan deıin sheteldik mýzeıler men jeke kollektsıonerlerdiń qorynda Baqyt Bápishev, Asqar Esdáýletov, Kamıl Mýllashev, Sholpan jáne Birjan Tólesh, Evgenıı Frıdlın, Edýard Kazarıan, Andreı Noda, Marat Bekeev, Alpysbaı Qazǵulov, Batýhan Baımen, Baqytnur Búrdesbekov, Rafael Slekenov, Leıla Mahat, Asqar Esenbaev pen Jámılá Táken sııaqty qazaqstandyq sýretshilerdiń jumystary saqtalǵany habarlanǵan edi.
