Patrısııa Kaas: Halyq meniń atymdy saıasatpen emes, qaıyrymdylyqpen baılanystyrǵanyn qalar edim
ASTANA. 30 qarasha. QazAqparat - Tanymal frantsýz ánshisi Patrısııa Kaas álemdik týrne aıasynda Astanada 121-kontsertin ótkizýde. Patrısııa Kaas elordalyq kórermen nazaryna áıgili frantsýz oryndaýshysyn eske alýǵa arnalǵan «Kaas poet Pıaf» atty dýmanyn usynady.
Búgin áıgili artis jýrnalısterge suhbat berip, óziniń álemdik mádenı saıahaty jáne ózi týraly biraz syrdy búkpesiz aqtaryp saldy.
Kaas óziniń shyǵarmashylyq ǵumyrynda myńdaǵan kontsert ótkizdi, onyń dıskileri dúnıeniń ártarapynda 18 mıllıon danamen satylǵan. Frantsýzdar ony óz eliniń resmı emes mádenıet elshisi dep ataıdy. Sebebi P.Kaas áıgili Edıt Pıaftan keıin frantsýz ánin búkil álemge tanytqan ekinshi kúmis kómeı ánshi bolyp tabylady. Biraq Patrısııa Kaas ózin juldyz dep ataýdan aýlaq.
«Suraǵanynyń barlyǵyn ákep bergizetin ánshiler bar. Gastrolge shaqyrǵan kezde, mende de talaptar bolady. Biraq buny erkelik nemese nazdan týǵan talaptar dep aıta almaımyn. Joq, men juldyz emespin. Men tek kontserttiń oıdaǵydaı ótýine qajet nárselerdi suratamyn», - deıdi Patrısııa.
Ártistiń bul sózin Astana qalasy Mádenıet basqarmasynyń tóraǵasy Bolat Majaǵulov ta qýattady. Ánshi Frantsııanyń Qazaqstandaǵy jyly aıasynda shaqyrylǵan. Onyń sózine qaraǵanda, Kaastyń suratqan talaptary óte qarapaıym.
«Álemdik deńgeıdegi ánshi úshin, onyń raıderi shynymen de qarapaıym. Onyń negizgi talaby - dybys pen jaryqtyń joǵary deńgeıde bolýy ǵana. Ol ózin emes, aınalasyndaǵy komanda múshelerin kóp oılaǵany tań qaldyrdy. Olar úlken qıyndyqtar kórmeý úshin barlyq jaǵdaılardy jasaýǵa tyrysty», - deıdi B.Majaǵulov.
Frantsýz ánshisin saıasatqa qalaı qaraıtynyn suraǵanda, ol bul salaǵa áýes emestigin jáne saıasatqa bas suqpaǵanyn qalaıtynyn aıtty.
«Eń birinshi kezekte men ártispin jáne saıasatqa aralasqym kelmeıdi. Men ózim bile qoımaıtyn salaǵa bas suqpaýdy qup kóremin. Meniń atymdy qaıyrymdylyqpen baılanystyrǵanyn qalar edim», - dep atap ótti ánshi.
Patrısııa Kaastyń bul Qazaqstanǵa ekinshi sapary. Birinshisi 15 jyl buryn bolǵan. 2013 jyly ánshi 150-den astam kontsert qoımaq.
Baǵdarlamaǵa tyńdarmandar súıip tyńdaıtyn Padam-Padam, Je T'ai Dans La Peau ánderi, sonymen qatar, orys tilindegi «Ty ne pozvonısh», «Mne nravıtsıa, chto Vy bolny ne mnoı» jáne taǵy basqa kompozıtsııalar engen», - delingen habarlamada.
Patrısııa Kaas - frantsýz ánshisi jáne aktrısa, álemdik estrada juldyzy, «World Music Awards» nagradasynyń ıegeri, Frantsııanyń úzdik daýysy.
Eske salaıyq, kontsert Frantsııanyń Qazaqstandaǵy jyly aıasynda 30 qarashada saǵat 18.00 «Qazaqstan» ortalyq kontsert zalynda Astana qalasy ákimdiginiń qoldaýymen ótedi.
