Patrıotızm máselesinde mektep týrızmin qalyptastyrýǵa tıispiz - A. Smaıyl
ASTANA. 4 qyrkúıek. QazAqparat - Patrıotızm máselesinde mektep týrızmin qalyptastyrýǵa tıispiz. Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Aldan Smaıyl osy máseleni kóterdi.
Saýal barysynda depýtat Elbasynyń «Qazaqstan - 2050» strategııasy aıqyndalǵan Joldaýynda ulttyń tarıhı sanasyn qalyptastyrý mindetine aıryqsha mán berilgenin atap ótti. «Sol tarıhı sana Qazaqstan órenderiniń boıynda qaı kezden qalyptasa bastaýy kerek? Tarıhty qurmetteý sezimi búgingi baldyrǵanda bar ma? Joq bolsa, ne isteý qajet? Bul saýaldarǵa qazirgi tańda memleket te, qoǵam da, zııaly qaýym da jaýap izdeýde. Tarıhqa oralý, jeńister men jeńilisterge, qatelik pen danalyqqa, ókinishter men qýanyshtarǵa toly uzaq tarıhqa oralý úrdisi qaýyrt júrip jatyr. Tarıhty, barlyq aqıqatyn ashyq aıtyp, qaıta jazý qolǵa alyndy. Kónergen ǵasyrlardy ózgelerdiń jalasy men jalǵandyǵynan tazartýǵa bet burdyq. Osy qarbalasta bir másele, bizdińshe óte ózekti másele, jetkinshekterdi tarıhtyń ýyzyna jarytý máselesi qaltarysta qalyp barady. Biz budan bylaı mektep týrızmin qalyptastyrýǵa tıispiz», - deıdi A. Smaıyl.
Onyń aıtýynsha, búgingi balalardy patrıottyq qulshynystan tys qalyp barady. «Talaı tarıhı jaýharlar quladúzde jetimsirep tur. Olar qazaqtyń búgingi urpaǵymen tabyspaı jatyr. Bilim jáne ǵylym mınıstrligi sony eskerip, mektep týrızmin qalyptastyrý jóninde arnaıy baǵdarlama jasaǵany abzal. Oblystar, qalalar men aýdandar ákimdikteri oqý ozattaryn jaz aılarynda elimizdiń tarıhı jerlerine saparǵa jiberýdi maqsat etse, múmkindikteri jetkilikti emes pe?! Eger osylaı jasasaq, ýaqyt óte kele mektep týrızmi respýblıkadaǵy jalpy týrızmniń súbeli salasyna aınalar edi. Qolǵa alynbaı kele jatqan, shyn máninde eleýli rýhanı jáne eldik mańyzy bar osy sharany, mektep týrızmin qalyptastyrýdy júzege asyrýǵa yqpal etýińizdi ótinemin», - dedi depýtat.
