Patrık Alloteı: Qazaqstanǵa Qanattyń belbeýin alýǵa bara jatyrmyn
ASTANA. QazAqparat - Qanat Islamnyń qarsylasy, ganalyq Patrık Alloteı jergilikti tilshilerge bergen suhbatynda, Qazaqstanǵa tek belbeý alý úshin baratynyn aıtty.
«Qazir kúnine eki ret jattyǵý jasap júrmin. Qanattan qoryqpaımyn. Ol nebári 21 kezdesý ótkizgen. Men odan qaraǵanda tájirıbelimin. Kásipqoı boksta 36 jekpe-jek ótkizgenmin, onyń 34-tin jeńispen aıaqtadym. Ol maǵan qurmetpen qaraý kerek. Qanattyń rıngte jibergen qateligin men nokaýtqa aınaldyramyn. Bul jekpe-jek maǵan úlken múmkindik. Basty maqsatym, jeńiske jetip, eki belbeýge ıe bolý. 29 qazanda ganalyqtardy qýantamyn! Bul jekpe-jekke tolyǵymen daıynmyn» - dedi ol.
Otandasymyz Qanat Islam bul jekpe-jekke jattyqtyrýshysy Nelson Lopespen birge qazir Almatydaǵy AIBA boks akademııasynda daıyndalyp jatyr. Boks keshinde Qanat Islam WBA Fedelatin chempıondyq belbeýin qorǵap, WBO intercontinental tujyrymynyń chempıondyq belbeýi úshin judyryqtasady.
Aıta keteıik, jekpe-jek Almaty qalasyndaǵy 12 myń oryndyq «ALMATY ARENA» sport kesheninde ótedi. Boks keshinde Jánibek Álimhanuly, Janqosh Turarov, Rýslan Myrsataev, Álı Ahmetov, Aıdar Sháribaev, Aıdos Erbosynuly sharshy alańǵa shyǵady. Bıletter 3 qazannan bastap satylymǵa shyǵady.
Sports.kz
