Patologoanatomdar Kókshetaýdaǵy júkti kelinshektiń ólimine ne sebep bolǵanyn anyqtaı almady
KÓKShETAÝ. QazAqparat - Kókshetaýdyń perınataldyq ortylyǵynda júkti kelinshektiń kóz jumýy sebebin patologoanatomııalyq tekseris anyqtaı almady. Dárigerler sot-medıtsınalyq saraptamanyń qorytyndysyn kútip otyr, dep habarlaıdy QazAqparat tilshisi.
«Júkti kelinshektiń ólimine qatysty oqıǵaǵa baılanysty ázirge eshteme aıta almaımyn. Kelinshek az mólsherde - 1300 ml. qan joǵaltty. Ol odan ólýi múmkin emes. Dárigerlik qajetti kómektiń barlyǵyn kórsetti. Qasynda tájirıbeli eki akýsher-gınekolog boldy. Kelinshektiń qan qysymy joǵary bolǵandyqtan, ol stantsıonarǵa jatqyzylǵan. Biz patologoanatomııalyq tekseriske qatystyq. Patologoanatomnyń ózi ólimniń sebebin anyqtaı almady. Endi sot-medıtsınalyq saraptamanyń qorytyndysyn kútetin bolamyz», - dep túsindirdi QazAqparat tilshisine Aqmola oblysynyń densaýlyq saqtaý basqarmasy basshysynyń ana men bala densaýlyǵyn qorǵaý jónindegi orynbasary Tatıana Bıshoraeva.
Dárigerdiń sózinshe, kelinshektiń nárestesi tiri.
Eske sala keteıik, tamyzdyń 06-sy kúni Kókshetaýdaǵy perınataldyq ortalyqta Krasnoıar kentiniń turǵyny - 25 jastaǵy kelinshek kóz jumǵan bolatyn. Oqıǵaǵa baılanysty QR QK 317-babynyń 3-bóligi (Medıtsına nemese farmatsevtıka jumyskeriniń kásiptik mindetterin tıisinshe oryndamaýy) boıynsha is qozǵalyp, sotqa deıingi tergeý amaldary júrgizilýde.
