Páterinen baılap áketken: Almatyda kisi ólimine qatysy bar tórtinshi kúdikti ustaldy
ALMATY. KAZINFORM — Almatyda beınejazbaǵa túsip qalǵan qylmys boıynsha jańa derekter belgili boldy.
Almaty qalasy polıtsııa departamentiniń málimetinshe, 61 jastaǵy turǵyndy óltirý deregi boıynsha qazir 4 kúdikti ustalǵan. Qylmystyq isti tergeý úshin ІІM-niń eń tájirıbeli qyzmetkerlerinen arnaıy tergeý-jedel toby qurylǵan.
— Tergeý barysynda qylmystyń mán-jaıy, kúdiktilerdiń jeke basy jáne olardyń marqumnyń páterin zańsyz ıemdenýge qatysy bolýy múmkin ekeni anyqtaldy. Tórt kúdiktiniń barlyǵy ýaqytsha ustaý ızolıatoryna qamaldy. Qazirgi ýaqytta qajetti jedel-tergeý is-sharalary júrgizilip jatyr, — dep habarlady polıtsııadan.
Tergeý barysy Іshki ister mınıstriniń jeke baqylaýynda ekeni atap ótildi.
Eske salaıyq, buǵan deıin Almatyda tańǵy saǵat 4:34–te er adamnyń basyna paket kıgizip, es-tússiz kúıde kóterip áketken vıdeosy tarady. Jelidegiler muny «zańsyz rıeltorlardyń» áreketi dep kúdiktenedi.
Keıin Almaty polıtsııasy úsh kúdiktiniń qamaýǵa alynǵanyn rastady.
