Páterine sheteldikterdi kóptep tirkeý arqyly paıda tabatyndar anyqtalyp jatyr

ASTANA. KAZINFORM – Elimizdiń iri úsh qalasynda páter ıeleri óz baspanasyna bóten adamdardy shamadan tys kóp tirkegen. Bul týraly búgin Іshki ister mınıstrligi Kóshi-qon qyzmeti komıtetiniń tóraǵasy Aslan Atalyqov aıtty.

«Elimizdiń qalalarynda páter ıeleleri óz baspanasyna bóten adamdardy kóptep tirkep jatady. Qazaqstan azamattary men sheteldikterdi jalǵan tirkeýdiń eń kóp sany respýblıkalyq mańyzy bar úsh qalada anyqtaldy. Osyndaı 1348 páterte 36 myńǵa jýyq adam tirkelgen», - dedi A.Atalyqov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, tıisti is-sharalardyń nátıjesinde mundaı páterler sany aıtarlyqtaı azaıdy.

«Jalpy, jalǵan tártipte adamdardy tirkeý zańsyz ekenin atap ótkim keledi. Munyń bir sebebine toqtalsam, osymen aınalysatyn adamdar paıda tapqysy keledi. 5 myń teńgege jalǵan tirkeýdi usynǵan jarnamalar tolyp júr. Sheteldikter úshin mundaı tirkeý sál joǵary. Osy adamdardy anyqtap, jaýapqa tartyp jatyrmyz. Qazir jaýapkershilikti kúsheıtý máselesi talqylanyp jatyr», - dedi komıtet basshysy.

Budan buryn habarlanǵandaı, elimizde 196 myń sheteldik turaqty turyp jatyr.