Páterlerin jalǵa beretin keıbir elordalyq turǵyndar zańbuzýshylyqqa jol beredi
ASTANA. 7 tamyz. QazAqparat - Astanada páterlerin jalǵa beretin keı azamattar zańdy belden basýda. Eger baspana jezókshelikpen aınalysý úshin tapsyrylsa,
páter ıesine aıyppul salynady. Ákimshilik quqyqbuzýshylyqtar týraly kodekske tıisti ózgertýler engizilip, kúshine endi. Bul týraly astana.kz saıtyna qalalyq ІІD baspasóz qyzmetinen habarlady.
«Jedel-aldyn alý is sharalary barysynda elordalyq ІІD Uıymdasqan qylmysqa qarsy kúres basqarmasynyń qyzmetkerleri men ýchaskelik ınspektorlar 10 kúnniń ishinde turǵyn jaılardy jezókshelikpen aınalysýǵa berýdiń 12 faktisin anyqtady. Materıaldar is júrgizý sheshimderin qabyldaý úshin sotqa joldandy», - delingen aqparatta.
Mysaly, jynystyq qyzmetter kórsetý úshin úıin uzaq merzimge jalǵa bergen páter ıesi anyqtaldy. Ustalǵan azamatqa qatysty ákimshilik hattama toltyryldy. Páterdi jalǵa berý faktisi boıynsha jınalǵan materıaldar ákimshilik sotqa joldandy.
Ústimizdegi jyly 6 tamyzda sot tekserýleri barysynda atalǵan páter ıesi QR Ákimshilik quqyqbuzýshylyqtar týraly kodekstiń 341-1 baby (bile tura jezókshelikpen aınalysý nemese jeńgetaılyq úshin úı-jaılar usyný) boıynsha ákimshilik jaýapkershilikke tartylyp, 300 AEK kóleminde (411.300 tenge) aıyppul tóledi.
Ákimshilik sottyń sheshimimen ustalǵan azamattyń kásipkerlik qyzmetin 6 aı merzimge toqtatý týraly sheshim qabyldandy.
