Páterlerge jeke jylý eseptegish quraldaryn ornatý ázirshe tıimsiz – energetıkter
PETROPAVL. QazAqparat – Petropavl qalasynda salynyp jatqan turǵyn úıler jobalaý kezeńinde-aq jeke jylý eseptegish quraldarymen qamtylady. Alaıda is júzinde onyń turǵyndar úshin paıdasy shamaly. Soltústikqazaqstandyq sarapshylar tutynýshylarǵa nelikten ázirshe jylýdan únemdeýdiń múmkin emestigin túsindirdi, dep habarlaıdy QazAqparat tilshisi.
«SevKazEnergo» AQ baspasóz qyzmetiniń málimetinshe, turǵyndar tarapynan túsinispeýshilikter jıi týyndaıdy. Jeke eseptegish quralyn ornatqan tutynýshylar tek «óz páterlerine kelgen jylý úshin ǵana tóleımiz, nátıjesinde únemdeımiz» dep oılaıdy. Alaıda únemdeý ázirshe múmkin bolmaı otyr.
«Basty sebebi – elimizde zańdyq baza qalyptaspaǵan. Jeke eseptegish quraldary páterlerge ornatylǵanymen, olarmen esep aıyrysý erejesi bekitilmegen. Zańnamalyq deńgeıde bekitilgen tıisti qujattar joq. Qurylǵylardy kommertsııalyq esepke alý úshin jeke jylý eseptegishterin zańdastyrý qajet. Іs júzinde respýblıkanyń ólshem birligin qamtamasyz etetin memlekettik júıeniń arnaıy tiziliminde bolýy tıis. Mundaı jazbasyz eshbir uıym ózine jaýapkershilik alyp, beımálim qurylǵymen esep aıyryspaıdy», - deıdi «Sevkazenergosbyt» JShS bas dırektorynyń mindetin atqarýshy Maǵaýııa Saǵyndyqov.
Petropavlda myńnan astam kópqabatty úı bolsa, sonyń 766-synda jylý energııasyn esepteıtin ortaq qurylǵy bar. Eseptegish quraldyń kórsetkishi ár tutynýshyǵa bólinip, olar páterdegi sharshy metrge qaraı kommýnaldyq aqy tóleıdi. Ortaq eseptegish qural bolmaǵan jaǵdaıda belgilengen tarıf boıynsha esep aıyrysady.
«Jeke eseptegish quraldarymen qatar úıdiń ortaq eseptegish quraly bolýy qajet. Tutynýshy tek óz páteri úshin ǵana emes, podezdi jylytqany úshin de tóleıtinin esten shyǵarmaýy kerek. Sondaı-aq bul qurylǵylardyń toqtaýsyz jumys isteýi úshin oǵan belgili bir qyzmet jaýap berýi kerek. Sol sebepti ázirshe jeke jylý eseptegish quraldaryn ornatý tıimsiz, ári erte», - deıdi «Petropavl Jylý Jelileri» JShS bas dırektory Andreı Kalınıchev.
