Páterlerdi arzanǵa alyp beremin: pavlodarlyq qyz adamdardy 9 mln teńgege aldaǵan
PAVLODAR. KAZINFORM - Pavlodarda 21 jastaǵy qyz alaıaqtyq jasaǵany úshin úsh jylǵa bas bostandyǵynan aıyryldy. Ol ıesiz páterlerdi arzan baǵamen satyp alýǵa bolady dep adamdardy aldaǵan.
Tergeý materıaldaryna súıensek, pavlodarlyq qyz týystaryna óziniń ákimdikte jumys isteıtinin jáne arzan baǵaǵa páter satyp alýǵa kómektese alatynyn aıtqan. Turǵyn úıler ıesiz, olardy bólip tóleý arqyly satyp alýǵa múmkindik bar dep aldaǵan. Ol úshin tek bastapqy jarnany tóleý qajet bolǵan.
Jábirlenýshiler onyń usynysyna kelisip, qyzdyń esepshotyna aqsha aýdara bastaıdy. Keltirilgen shyǵyn kólemi – 200 myń teńgeden 2 mıllıon teńgege deıin. Alaıda keıin olardyń eshqaısysy ýáde etilgen páterlerdi ala almaǵan.
Buǵan qosa qyz páter jaldap, ony ózi satýǵa ýáde bergen baspana retinde keıbir jábirlenýshilerge kórsetken.
Memlekettik aıyptaýshy keltirilgen jalpy shyǵyn kólemi 9 mln teńgege jýyq ekenin málimdedi. Qylmystyq is alaıaqtyq deregi boıynsha qaraldy. Sot is materıaldaryn saralaı kele, sottalýshynyń kinási dáleldendi degen qorytyndyǵa keldi.
- Aıyptalýshy Qylmystyq kodekstiń 190-baby 3-bóligi 4-tarmaǵynda kózdelgen qylmystyq quqyq buzýshylyqty jasaǵany úshin kináli dep tanylyp, qylmystyq-atqarý júıesiniń ortasha qaýipsizdik mekemesinde jazasyn óteý arqyly 4 jyl merzimge bas bostandyǵynan aıyrý jazasy taǵaıyndalsyn, - dedi Pavlodar qalasynyń qylmystyq ister jónindegi mamandandyrylǵan aýdanaralyq sotynyń sýdıasy Ánýarbek Ospanov úkimdi jarııalaý kezinde.
Sonymen qatar sot jańa Konstıtýtsııanyń qabyldanýyna oraı jarııalanǵan raqymshylyq týraly zańdy qoldanyp, jazany 3 jylǵa deıin qysqartty.
Sondaı-aq 21 jastaǵy qyzǵa jábirlenýshilerge keltirilgen materıaldyq shyǵynnyń 6 mln teńgege jýyq bóligin óteý mindetteldi.
Úkim zańdy kúshine áli engen joq.
Eske sala keteıik, Pavlodarda ashana kassıri 7 mln teńgeden astam somany zańsyz ıemdengen.
