Páterinde qulap, balasyna esik asha almaǵan: SQO-da áıel qutqaryldy
PETROPAVL. QazAqparat – Petropavlda bir kúnde eki áıel qutqarýshylardyń kómegine júgindi. Biri ózdiginen saýsaǵyndaǵy saqınasyn sheshe almasa, ekinshisi páterinde qulap, balasyna esigin ashýǵa shamasy kelmegen, dep habarlaıdy QazAqparat tilshisi.
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, tańǵy saǵat 8.00 shamasynda «112» nomirine Petropavldaǵy 20-yqshamaýdannyń 45 jastaǵy turǵyny habarlasqan. Áıel saýsaǵynyń isip, saqınanyń sheshilmeı jatqanyn aıtqan. Qutqarýshylar oǵan sanaýly mınýtta kómek kórsetti.
«Saqınany áıelge zııan keltirmeı abaılap sheshý qajet boldy. Arnaıy qaıshyny qoldandyq. Buǵan deıin de birneshe áıelge osyndaı kómek kórsetkenbiz. Al bir jaǵdaıda balanyń saýsaǵynan oıynshyq drotıktiń shyǵyrshyǵyn kesip aldyq», - deıdi qutqarýshylar tobynyń jetekshisi Opal Joldaspaev.
Sol kúni keshki saǵat 20.00-der shamasynda taǵy bir áıelge qutqarýshylardyń kómegi qajet boldy. «112» qyzmetine er adam habarlasyp, Petropavldaǵy Hımenko kóshesindegi sheshesiniń páterine kire almaı jatqanyn aıtqan. Ol 78 jastaǵy anasynyń úıde ekenin aıtqan, esiktiń syrtynan áıeldiń kómek suraǵan daýsyn estipti.
Qutqarýshylar er adamnyń ruqsatymen alpınıstik jabdyqty qoldanyp, qabatta ornalasqan páterge tereze arqyly kirdi. Úı ıesi áıel as bólmesiniń kireberisinde qulaǵan eken. Qozǵalýǵa shamasy bolmaǵan. Oqıǵa ornyna jetken jedel járdem qyzmeti áıeldi aýrýhanaǵa alyp ketti.
«Bizdiń jumysta munda ı jaǵdaılar jıi bolyp turady. Kóbinese jalǵyzilikti kórshilerine alańdaǵan turǵyndar habarlasady. Shaqyrtýǵa baramyz. Keıde jedel járdem qyzmetin shaqyramyz, keıde oǵan kesh bolyp jatady», - deıdi qutqarýshylar tobynyń jetekshisi Nurbolat Aısın.
