Páterinde esirtki daıyndaǵan semeılik azamat órtke sebepker boldy
SEMEI. QazAqparat - Semeıde páterinde esirtki daıyndaǵan azamat kók tútinge ýlanyp, aýrýhanaǵa jetkizildi, dep habarlaıdy QazAqparat Semeı qalalyq tótenshe jaǵdaılar basqarmasy men oblystyq ishki ister departamentine silteme jasap.
Irtyshskaıa kóshesindegi 10 qabatty turǵyn úıdiń ıesi páterindegi gaz plıtasyna esirtki zatyn daıyndaǵan. Mamandardyń aldyn ala boljamy boıynsha, azamat janǵysh suıyqtyq (atseton) jáne dári-dármekterdiń kómegimen qatty áser etetin esirtki jasamaqshy bolǵan. Biraq janǵysh suıyqtyqtyń saldarynan ot shyǵyp, ol materıaldar men asúı jıhazyna taraǵan. Qyzyl jalyndy ózi sóndirmekshi bolǵan azamattyń ol oıy júzege aspaǵan. Sóıtip kók tútinge ýlanyp qalǵan.
Órttiń jalpy aýmaǵy - 12 sharshy metr. Saldarynan asúı bólmesindegi zattar men jıhaz, turmystyq tehnıka janyp ketti.
«Órt sóndirýshilerdi azamattyń janyndaǵy seriktesi nemese kórshileri shaqyrǵan. 1977 jyly týǵan úı ıesine alǵashqy medıtsınalyq kómek kórsetilip, aýrýhanaǵa jetkizildi» delingen habarlamada.
Órtti sóndirý kezinde turǵyn úıden 25 adam qaýipsiz jerge kóshirildi. Onyń 8-i - balalar.
Sonymen qatar, 21 maýsym kúni órt saldarynan er adam kóz jumdy. Saǵat 20:31-de «101» nómerine Chımkentskıı kóshesindegi úılerdiń birinen órt shyqqany týraly habar túsken. Oqıǵa ornyna jetken qutqarýshylar úı ishinen 1956 jyly týǵan er adamnyń múrdesin alyp shyqty. Órttiń jalpy aýmaǵy - 35 sharshy metr.
Saldarynan jeke zattar, jıhaz, turmystyq tehnıka, úıdiń tóbesi men qabyrǵasy janyp ketti. Qazir mamandar oqıǵa ornynda tekserý jumystaryn júrgizip jatyr. Aldyn ala boljam boıynsha, órt qasaqana qoıylǵan nemese qaýipsizdik erejelerin saqtamaǵandyqtan oryn alǵan.
