Páterden shyqqan jylan qaraǵandylyqtardy shoshytty
QARAǴANDY. QazAqparat - 3 jeltoqsanda qutqarýshylarǵa Erjanov kóshesiniń boıyndaǵy kópqabatty turǵyn úıdiń páterinde jylan tabylǵany týraly habar túsken, dep habarlaıdy QazAqparat ekaraganda.kz saıtyna silteme jasap.
Oqıǵa ornyna Qaraǵandy oblystyq Tótenshe jaǵdaılar departamenti Jedel-qutqarý jasaǵynyń qutqarýshylary keldi.
Anyqtalǵandaı, úı ıesi jylandy qonaq bólmeniń qaq ortasynan kórgen. Qutqarýshylardy shaqyrǵansha ol belgisiz baǵytqa qaraı jyljyp ketken. Jylan as bólmeden tabylǵan.
Abyroı bolǵanda, baýyrymen jorǵalaýshy ýly emes bolyp shyqty. Aýlanǵan jylan veterınarlarǵa berildi. Onyń qaıdan kelgeni beımálim.
