Páterden aqshanyń urlanýy: Astana turǵyny órt sóndirýshilerden keshirim surady
ASTANA. QazAqparat - Elordadaǵy №16 mamandandyrylǵan órt sóndirý bóliminiń ǵımaratynda Feısbýk qoldanýshysy Ashat Sultanov órt sóndirýshilerdiń aldynda keshirim surady, dep habarlaıdy «QazAqparat» HAA tilshisi.
Buǵan deıin habarlaǵanymyzdaı, aǵymdaǵy jyldyń 16 naýryzynda Astanadaǵy 14 qabatty «Kóktem-2» turǵyn úı kesheninde páter órtenip, jalynmen kúreske 2 tehnıkamen 16 maman jóneltilgen bolatyn. Páterdiń jatyn bólmesinde úı-turmystyq zattar men jıhazdar janyp jatqan. Jalyn jarty saǵatta tolyqtaı sóndirildi.
Keıin baspana ıesi Ashat Sultanov Feısbýk jelisinde páterinen qomaqty aqsha, ıaǵnı 15 mln teńge men 8 myń dollar urlanǵanyn jazyp, oǵan órt sóndirýshilerdi aıyptaǵan bolatyn.
Óz kezeginde Tótenshe jaǵdaılar komıteti bul jaǵdaıǵa túsinikteme berdi. «Oqıǵa ornynda aqsha joǵaldy degen habar kelgen soń Órt sóndirý qyzmetiniń basshylyǵy men polıtsııa qyzmetkerleri sonda bardy. Túsiniktemeler alyndy. Tekserý júrip jatyr», - dep habarlady TJK ókilderi.
Budan keıin Astanada órtengen páterden qomaqty aqshanyń qalaı joǵalǵany anyqtalǵan edi. 27 naýryzda QR ІІM iri kólemdegi aqshany urlap, izderin jasyrý úshin baspanany órtep ketken kúdiktilerdiń ustalǵanyn habarlady.
Mán-jaı anyqtalǵannan keıin Ashat Sultanov Feısbýkte qutqarýshylardan keshirim suraǵan bolatyn. Al búgin ol №16 mamandandyrylǵan órt sóndirý bólimine arnaıy keldi.
«Qurmetti dostar! Emotsııamen aıtylǵan jáne jazylǵan barlyq sózderim úshin zor ókinishpen keshirim suraımyn. Ol kezde men qalada emes edim. Barlyq aqparat dál sol jerde bolǵan dostarymnan kelip turdy. Álbette, áý basta «Nege?», «Ne boldy?» degen suraqtar sanama sap ete tústi. Úıge kirgenimizge úsh aı ǵana bolǵan edi. Alǵashqy nusqa - baqytymyzǵa qaraı qate bolyp shyqty. Dese de, osylardyń barlyǵyn emotsııamen jazyp jiberdim. Jigitter, taǵy da keshirim suraımyn. Óte jedel jumys atqaryp, adal eńbek etkenderińiz úshin barlyqtaryńyzǵa alǵys bildirgim keledi», - dedi Ashat Sultanov.
Ol óz sózinde oqıǵa bolǵannan keıin ekinshi kúni qandaı kúrdeli jaǵdaılar (órt sóndirýshilerdiń tergeý kezi - avt.) bolǵanyn túsinetinin aıtty.
«Shynymdy aıtsam, tergeý meni bolyp jatqan jaılardan aýlaq ustady. Órttiń symnan shyqqany týraly nusqa sońǵy ýaqytqa deıin aıtylyp keldi. Maǵan eshteńe aıtpady. Men kúnine birneshe ret qońyraý shalyp, bilip otyrýǵa tyrystym. Men shynynda da ony jasaǵan sizder emes ekenin úmittene kúttim. Sebebi, bizdiń qyzmetter bárin de adal ári minsiz atqaratynyna sengim keledi. Dál osy suraqtardy tergeýge qoıa berdim. Keıin urylar ustaldy. Olar (tergeýshiler - avt.) urylar kúdiktiń bári órt sóndirýshilerge túsetindeı etip sheber jasaǵanyn aıtyp berdi», - dedi ol.
Ashat Sultanovtyń sózinshe, tergeýshiler urlyqty jasaǵan órt sóndirýshiler emes ekenin birden bilgenin, alaıda ol týraly málimet ózine tek dúısenbide jetken.
