Páterde turǵyndardy shekteýsiz tirkeýge tosqaýyl qoıylmaq – zań jobasy
ASTANA. KAZINFORM — Páterde turmaıtyn adamdardy tirkeýden shyǵarmaǵany úshin turǵyn úı ıesine aıyppul 2 esege ósedi. Bul norma búgin Parlament Májilisinde tanystyrylǵan elordany jáne respýblıkalyq mańyzy bar qalalardy damytý máselelerine arnalǵan zań jobasynda qamtylǵan.
«Qazirgi kezde halyq iri qalalarǵa kóship kelýge tyrysady, bul úrdis páterlerde turǵyndardyń sanyn shekteýsiz tirkeý problemasyna alyp keldi. Kóbinese turǵyn úı ıeleriniń ózderi kóshi-qon zańnamasyn buzýǵa jol beredi, úıinde turmaıtyn azamattardy belgili bir tólem úshin tirkeıdi. Máselen, Astana qalasyndaǵy páterdiń birinde 800-den astam adam tirkelgen», - dedi Ulttyq ekonomıka vıtse-mınıstri Baýyrjan Omarbekov.
Osy máseleni sheshý maqsatynda:
- «Astana mártebesi týraly» Zańyna turǵylyqty jeri jáne elorda aýmaǵynda ýaqytsha bolatyn jeri boıynsha tirkeý normatıvin bekitý jónindegi máslıhattyń quzyretin keńeıtý;
- «Halyqtyń kóshi-qony týraly» Zańyna Astana aýmaǵynda belgilengen normatıvterden artyq tirkeýge tyıym salý boıynsha ózgerister engizý usynyldy.
«Bul rette, tirkeý normatıvteri turǵyn úıdiń menshik ıesi jubaıyn jáne jaqyn týystaryn tirkegen kezde qoldanylmaıdy. Sonymen qatar, Ákimshilik quqyq buzýshylyq týraly kodeksine ózgerister men tolyqtyrýlar engizý aıasynda turǵyn úılerde tirkelgen jáne turmaıtyn jeke adamdardy tirkeýden shyǵarmaǵany úshin turǵyn úı ıesine aıyppuldy 2 esege ulǵaıtý (10 AEK-ten 20 AEK-ke deıin) usynyldy», - dedi vıtse-mınıstr.
Budan buryn habarlanǵandaı, búgin Parlament Májilisinde «Qazaqstan Respýblıkasynyń keıbir zańnamalyq aktilerine astanany jáne respýblıkalyq mańyzy bar qalalardy damytý máseleleri boıynsha ózgerister men tolyqtyrýlar engizý týraly» zań jobasy tanystyryldy.
