Páter alamyz dep aldanǵan: Astanada Qyran isi boıynsha tórt adam sottaldy
ASTANA. KAZINFORM — Elordada «Qyran» turǵyn úı keshenindegi jyljymaıtyn múlikti satý kezindegi alaıaqtyq isi boıynsha úkim shyqty. Sot «International Invest Company IIC» JShS-niń 4 qyzmetkerin kináli dep tanyp, 8 jyldan 9 jylǵa deıin bas bostandyǵynan aıyrý jazasyna kesti.
Qarjylyq monıtorıng agenttiginiń Astana qalasy boıynsha departamenti tergeý barysynda sottalǵandardyń satyp alý-satý sharttaryn jasasýdyń ornyna memlekettik tirkeýge jatpaıtyn ári satyp alýshylarǵa menshik quqyǵyn bermeıtin brondaý sharttaryn, kepilaqy týraly kelisimder men aldyn ala sharttardy rásimdegenin anyqtady.
Agenttiktiń resmı ókili Ernar Taıjannyń sózinshe, satý keńsesinde JShS atynan áleýetti satyp alýshylarǵa nysandardyń maketteri, tehnıkalyq pasporttar, senimhattar men kompanııanyń jyljymaıtyn múlik nysandaryna menshik quqyǵy bar degendi rastaıtyndaı anyqtamalar kórsetilgen.
Azamattarǵa páterlerdi, turǵyn emes úı-jaılardy jáne avtoturaq oryndaryn naryq baǵasynan tómen baǵaǵa satyp alý usynylyp, mámilelerdiń tolyqtaı zańdy ekenine sendirgen. Jábirlenýshiler tólemdi qolma-qol da, alaıaqtyq syzbaǵa qatysýshylardyń jeke shottaryna aýdarý arqyly da júrgizgen. Bul operatsııalar «International Invest Company IIC» JShS-niń býhgalterlik jáne banktik qujattarynda kórsetilmegen.
Budan bólek, sottalǵandar qurylys salýshy kompanııanyń óz qarajatyn jymqyrýǵa baǵyttalǵan ekinshi alaıaqtyq syzbany da iske asyrǵan.
Olar «International Invest Company IIC» JShS atynan klıenttermen jalǵan satyp alý-satý sharttaryn jasap, jyljymaıtyn múlik nysandaryna menshik quqyǵyn tirkegen. Alaıda satýdan túsken aqsha kompanııanyń kassasyna túspegen.
— Sot 35 jábirlenýshiniń jalpy somasy 2,2 mlrd teńgeden asatyn talap aryzdaryn qanaǵattandyrdy. Sondaı-aq «International Invest Company» JShS paıdasyna 3,9 mlrd teńge óndirip alý týraly sheshim shyǵardy. Jábirlenýshilerge jalpy quny 1,3 mlrd teńge bolatyn 78 jyljymaıtyn múlik nysany berildi. Taǵy 73 nysan adal nıetti satyp alýshylarǵa berildi. Úkim zańdy kúshine engen joq, — dedi Ernar Taıjan.
Buǵan deıin Astana prokýratýrasy «Qyran» turǵyn úı keshenine qatysty isti sotqa joldaǵanyn jazǵanbyz.
