«Páter» jedel-saýyqtyrý sharasy elordadaǵy páter urlyqtarymen aınalysyp júrgen urylardyń qolǵa túsýine sebepker boldy
ASTANA. Aqpannyń 23-i. QazAqparat /Aıdar Ospanalıev/ - Astana qalalyq Іshki ister departamentiniń qyzmetkerleri qaladaǵy páter urlyǵymen kúres sharalarynyń tıimdiligin arttyrý maqsatynda aqpannyń 16-sy men 18-i kúnderi «Páter» jedel-saýyqtyrý sharasyn júrgizdi,
dep habarlaıdy QazAqparat.
Atalmysh sharanyń uıymdastyrylýyna oraı qalalyq ishki ister departamenti qyzmetkerlerinen 40 jedel izdestirý toptary qurylyp, top ókilderi arnaıy júrgizilgen saraptaý jumystarynyń negizinde qaladaǵy páter eń kóp tonalady degen aımaqtardy torýyldaǵan. Sondaı-aq urlanǵan taýarlar satylýy yqtımal oryndar, ıaǵnı bazarlar men arnaıy belgilenbegen jerlerde júrgiziletin saýda oryndary da jiti baqylaýǵa alynǵan. Tártip saqshylary shara barysynda qaraqshylyq shabýyldar men tonaý jáne urlyq jasaǵan adamdardy ustaý baǵytynda belsendi jumystar júrgizgen.
Jedel-saýyqtyrý sharasy júrip jatqanda, ıaǵnı aqpannyń 16-sy kúni elordanyń 30 jasar turǵyny polıtsııa organdaryna kelip, kúndiz óziniń páteriniń esigin buzyp kirgen bireýlerdiń 162 myń teńge turatyn múlikterin qoldy qylǵandyǵyna shaǵymdanǵan. Atalmysh áreket boıynsha júrgizilgen izdestirý jumystary kezinde tártip saqshylary kúdikti «Aýdı A-6» kóligin ustaǵan. Al kólikte buryn sottalǵan 23 pen 27 jas aralyǵyndaǵy 4 azamat otyrǵan. Tekserý kezinde olardan páterden urlanǵan altyn buıymdar men páterdiń qulpyn buzýǵa arnalǵan qoldan jasalǵan zattar tabyldy. Qylmystyq toptyń qalada 4 páterdi tonaǵandyǵy anyqtalyp otyr. Olar Astana qalalyq Іshki ister departamentiniń ýaqytsha ustaý oqshaýlaǵyshyna qamaldy. Endi qylmystyq top músheleriniń shahardaǵy ózge de qylmystarǵa qatystylyǵy tekserilýde.
