«Páter» jedel-saýyqtyrý sharasy barysynda 274 páter urlyǵy anyqtalyp, olardyń 244-i izi sýymaı ashyldy
ASTANA. Mamyrdyń 19-y. QazAqparat /Aıdar Ospanalıev/ - «Páter» jedel-saýyqtyrý sharasy barysynda 274 páter urlyǵy anyqtalyp, olardyń 244-i izi sýymaı ashyldy. Sondaı-aq osy qylmystarǵa qatysty 421 kúdikti qolǵa túsip, syrttan kelgen 5 ury ustaldy. Buǵan qosa taǵy 277 páter urlyǵyn jasaǵan 17 qylmystyq top músheleri qolǵa tústi.
Aǵymdaǵy jyldyń 12-si men 16-sy aralyǵynda júrgizilgen «Páter» operatsııasynyń nátıjeleri osyndaı bolyp otyr.
Іshki ister mınıstrligi taratqan derekterge qaraǵanda, mamyrdyń 12-si kúni Atyraýda 17 páterdiń qulpyn buzyp tonap ketken Qyzylorda qalasynyń 3 azamaty ýaqytsha ustaý orynyna jabyldy. Al mamyrdyń 13-i kúni Petropavl qalasynda T. esimdi azamattyń 3 páterdi tonaǵany dáleldendi. Sondaı-aq Batys Qazaqstan oblystyq tártip saqshylary 40 jasar azamatty ustap, ol bultartpas dálelderdiń nátıjesinde Oral qalasy turǵynynyń úıin tonap, ol jerden 500 myń teńgeniń dúnıe-múlkin alyp ketkendigin moıyndaǵan.
