Páter jalǵa beremin dep ondaǵan adamnan aqsha alǵan aqtóbelik sottaldy
AQTÓBE. KAZINFORM — Sottalýshy jarnama saıty arqyly habarlandyrý berip, aldyn ala tólem qabyldap otyrǵan. Ol sotta taǵylǵan aıypty moıyndady.
Aqtóbe qalasynyń № 2 sotynda Qylmystyq kodekstiń «Alaıaqtyq» baby boıynsha is qaraldy. Sottalýshy óziniń páteri, úıi bolmasa da habarlandyrý berip, adamdardy ońaı aldap otyrǵan.
— «Krisha.kz» qosymshasy arqyly páterdi jalǵa beremin degen maǵynada jarnama qaldyrǵan. Jábirlenýshilerden aqsha alyp, óz qajetine jumsaǵan. 29 jábirlenýshige 1 136 000 teńge kóleminde materıaldyq shyǵyn keltirdi. Sot otyrysynda sottalýshy óz kinásin tolyq moıyndady. Sot úkimimen sottalýshy Qylmystyq kodekstiń 190-babynyń 3-bóliginiń 4-tarmaǵymen kináli dep tanylyp, oǵan 3 jyl merzimge bas bostandyǵynan aıyrý jazasy taǵaıyndaldy. Aqtóbe oblystyq sotynyń qylmystyq ister jónindegi sot alqasynyń qaýlysymen «Raqymshylyq jasaý týraly» Zańy qoldanylyp, jaza merzimi 2 jyl 3 aı qysqartyldy, — dep habarlady Aqtóbe qalasynyń № 2 sotynyń baspasóz qyzmeti.
Sot úkimi zańdy kúshine endi.
Buǵan deıin habarlaǵanymyzdaı, Astanada azamattardyń derbes derekteri men bank qarajatyn ıemdenýge baǵyttalǵan aýqymdy fıshıngtik shema áshkerelendi. Qylmystyq top tórt kún ishinde Beeline, Kcell jáne Activ abonentterine shamamen 150 myń jalǵan SMS-habarlama jibergen.
