Páter jaldaımyn dep aldanyp qalmańyz: 13 adam 2,1 mln teńgesinen aıyrylǵan
ASTANA. KAZINFORM — Astanalyq áıel Qazaqstannyń birneshe qalasynda páterdi jalǵa berý týraly jalǵan habarlandyrý jarııalap, 13 adamdy aldaǵan. Ol jábirlenýshilerden depozıt nemese aldyn ala tólem retinde aqsha alyp, jeke qajetine jumsaǵan. Keltirilgen shyǵyn kólemi 2,1 mln teńgeden asty.
Astana qalasy prokýratýrasynyń málimetinshe, 37 jastaǵy áıel ózin páter ıesi retinde tanystyryp, tanymal jarnama platformasyna jalǵan habarlandyrýlar ornalastyrǵan. Sóıtip, turǵyn úı izdegen azamattardy aldyn ala aqsha aýdarýǵa kóndirgen.
Qysqa ýaqyt ishinde onyń áreketinen 13 adam zardap shekken. Jalpy shyǵyn 2,1 mln teńgeni qurady.
— Sot áıeldi eki nemese odan da kóp adamǵa qatysty birneshe ret alaıaqtyq jasaǵany úshin kináli dep tanyp, 7 jylǵa bas bostandyǵynan aıyrdy. Alaıda kámeletke tolmaǵan balasynyń bolýyna baılanysty jazany oryndaý 3 jylǵa keıinge qaldyryldy, — delingen habarlamada.
Sot jábirlenýshilerdiń materıaldyq shyǵyndy óndirý týraly azamattyq talaptaryn tolyq qanaǵattandyrdy.
Astana qalasynyń prokýratýrasy turǵyn úıdi jalǵa alý kezinde saq bolýǵa shaqyrady. Azamattarǵa páter ıesiniń jeke basyn jáne menshik quqyǵyn rastaıtyn qujattaryn tekserý usynylady. Sondaı-aq jaldaý sharty jasalyp, qujattar tolyq tekserilgenge deıin aldyn ala tólem nemese kepilaqy aýdarmaǵan jón.
Osydan buryn SQO-da 40-qa jýyq turǵyn alaıaqtardyń qurbany bolǵanyn jazdyq.
