Páter jaldaý sýbsıdııasy qandaı jaǵdaıda toqtatylady
ASTANA. KAZINFORM — Qazaqstanda tabysy joq nemese tabysy tómen azamattardyń tórt sanatyna páter jaldaý aqysynyń bir bóligin memleket óteıdi. Alaıda baǵdarlama talaptary saqtalmasa, sýbsıdııa toqtatylady. Bul týraly OKQ ótken baspasóz májilisinde QR Ónerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov aıtty.
Vedomstvo ókiliniń aıtýynsha, arendalyq baspana kezegin kútip júrgen tabysy joq nemese tabysy tómen azamattardyń tórt sanatyna memleket jeke turǵyn úı qorynan jalǵa alǵan páter aqysynyń bir bóligin óteıdi.
— Sýbsıdııa jetim balalarǵa, kópbalaly analar men kópbalaly otbasylarǵa, I jáne II toptaǵy múgedektigi bar adamdarǵa, sondaı-aq múgedektigi bar balalardy tárbıelep otyrǵan otbasylarǵa beriledi. Ony alý úshin otbasynyń ár múshesine shaqqandaǵy tabys sońǵy alty aıda aıyna 50 851 teńgeden aspaýǵa tıis. Zeınetaqy men járdemaqy tabys retinde esepke alynbaıdy, — dedi spıker.
Onyń málimetinshe, qazir mundaı kómekti 11 200 otbasy alyp otyr.
Sondaı-aq, baǵdarlama boıynsha jaqyn týystarynan baspana jaldaýǵa bolmaıdy. Oǵan qosa, sýbsıdııa alyp otyrǵan azamat jalǵa alǵan páterinde ózi turýy kerek.
— Ákimdikter mundaı páterlerdi turaqty tekserip otyrady. Eger tekserý kezinde azamattyń jalǵa alǵan páterinde turmaıtyny nemese otbasy múshesinen baspana jaldap otyrǵany anyqtalsa, sýbsıdııa tóleý toqtatylady. Mundaı jaǵdaıda tólemdi qaıta qalpyna keltirý múmkindigi qarastyrylmaǵan, — dedi Baqytjan Júnisbekov.
Aıta keteıik, buǵan deıin Qazaqstanda turǵyn úıge muqtaj azamattarǵa 2 jáne 5 paıyzdyq jeńildetilgen ıpoteka beriletini jóninde jazdyq. Bıyl osy baǵytta 12,6 myń qaryz berý josparlanǵan. Oǵan 175,1 mıllıard teńge qarastyrylǵan.
