Páter izdep júrip, alaıaqtyń tuzaǵyna túsip qalmańyz

ASTANA. KAZINFORM — Abaı oblystyq PD baspasóz qyzmeti elimizde turǵyn úıdi jalǵa berý syltaýymen jasalatyn ınternet-alaıaqtyq faktileri de bar ekenin eskertti.

— Ásirese áleýmettik jelilerde, messendjerlerde jáne túrli habarlandyrý saıttarynda jarııalanǵan: «Baǵasy óte arzan», «Shuǵyl jalǵa beriledi», «Iesi shetelde/qalada joq», «Qazir bron jasamasańyz, basqa adam alyp qoıady» degen habarlamalar — alaıaqtardyń eń kóp qoldanatyn aıla-tásilderi, — deıdi tártip saqshylary.

Alaıaqtar qalaı áreket etedi?

Olar ózderin páter ıesi retinde tanystyryp, senimge kiredi. Keıin páterdi kórsetpeı-aq, qujattardy syltaýratyp, «kepil aqy», «aldyn ala tólem», «bron úshin» degen jeleýmen aqsha aýdarýdy talap etedi.

Aqsha aýdarylǵannan keıin telefon sóndiriledi, habarlamalar jaýapsyz qalady, al «páter» múlde joq nemese bóten adamǵa tıesili bolyp shyǵady.

Ózińizdi qalaı qorǵaýǵa bolady?

Abaı oblystyq PD atap ótkendeı, qaýipsizdik — óz qolyńyzda! Páterdi kózben kórmeı, eshqashan aqsha aýdarmańyz.

— Páter ıesiniń jeke kýáligin jáne menshik quqyǵyn rastaıtyn qujattaryn tekserińiz. Mindetti túrde jazbasha kelisimshart jasańyz. Kelisimshartsyz, qujatsyz ýádelerge senbeńiz. Eger sizdi asyqtyryp, qysym kórsetse — bul alaıaqtyqtyń aıqyn belgisi, — deıdi oblystyq PD.

Mynadaı sózderge eshqashan senbeńiz:

• «Qazir aýdarmasańyz, basqa adam alyp qoıady»
• «Qujatty keıin jiberemin»
• «Tek onlaın rásimdeımiz, bári zańdy»
• «Men rıeltormyn, senseńiz boldy»

Abaı oblysynyń Polıtsııa departamenti barlyq azamatty barynsha saq bolýǵa shaqyrady. Kúdikti jaǵdaı týyndasa nemese alaıaqtyqqa tap bolsańyz — dereý quqyq qorǵaý organdaryna habarlasyńyz.

Budan buryn Qazaqstanda mobıldi alaıaqtyqqa qarsy sharalar kúsheıtilgenin jazǵanbyz.