Páter izdep júrgenderdi alaıaqtar qalaı tuzaqqa túsiredi

SEMEI. KAZINFORM — Abaı oblysynyń polıtseıleri páter izdep júrgen halyqqa alaıaqtyń tuzaǵyna túsip qalmaýdyń joldaryn úıretti. 

Úıdi jalǵa beremin dep qaqpanǵa túsiretin ınternet-alaıaqtar az emes. Olar áleýmettik jelilerde, messendjerlerde jáne túrli saıttarda «Baǵasy óte arzan», «Shuǵyl jalǵa beriledi», «Úı ıesi qalada joq», «Qazir bron jasamasańyz, basqa adam alyp qoıady» degen syńaıdaǵy habarlandyrýlar jasaıdy. Al bul alaıaqtardyń eń kóp qoldanatyn aıla-tásilderi.

— Áýeli olar ózderin páter ıesi retinde tanystyryp, senimge kiredi. Keıin páterdi kórsetpeı-aq, qujattardy syltaýratyp «kepil aqy», «aldyn ala tólem», «bron úshin» degen jeleýmen aqsha aýdarýdy talap etedi. Aqsha aýdarylǵannan keıin múlde habar-osharsyz ketedi. Al páter múlde joq nemese bóten adamǵa tıesili bolyp shyǵady, — dep habarlady oblystyq Polıtsııa departamentinen.

Sondyqtan páterdi kózben kórmeı, eshqashan aqsha aýdarmańyz. Páter ıesiniń jeke kýáligin jáne menshik quqyǵyn rastaıtyn qujattaryn tekserińiz. Mindetti túrde jazbasha kelisimshart jasańyz. Eger sizdi asyqtyryp, qysym kórsetse — bul alaıaqtyqtyń belgisi.

— «Qazir aýdarmasańyz, basqa adam alyp qoıady», «Qujatty keıin jiberemin», «Tek onlaın rásimdeımiz, bári zańdy», «Men rıeltormyn, senseńiz boldy» degen sózderge senbeńiz. Barynsha saq bolyp, kúdikti jaǵdaı týyndasa nemese alaıaqtyqqa tap bolsańyz dereý quqyq qorǵaý organdaryna habarlasyńyz, — dep eskertti polıtseıler.

Eske salsaq, osyǵan deıin alaıaqtar 90-jyldardaǵy «eski» shemalardy jańa formatta qaıta qoldanyp jatqany habarlanǵan.