Páter urlyǵyna qatysty 43 qylmystyq top ustaldy - ІІM
NUR-SULTAN. QazAqparat – Eldegi barlyq urlyq túriniń ishinde páter urlyǵynyń úlesi 22,5 paıyzdy quraıdy. Bul týraly ІІM Qylmystyq polıtsııa departamentiniń basqarma bastyǵy Nurjan Rahmetýllaev aıtty, dep habarlaıdy QazAqparat tilshisi.
«Páter urlyǵynyń zalaly shamaly bolǵan kúnde de týra osy qylmys múlik ıelerine aıtarlyqtaı materıaldyq jáne moraldyq zııan keltiredi. Azamattardyń qaýipsizdigi men ómir súrý jaılylyǵynyń jalpy deńgeıine jaǵymsyz áser etedi», - dedi ol vedomstvoda ótken baspasóz máslıhatynda.
Osyǵan baılanysty quqyq qorǵaý organdaryna qylmystyń osy túriniń aldyn alý boıynsha erekshe mindetter júktelip otyr.
«Krımınogendik jaǵdaıǵa jasalǵan taldaý kórsetkendeı, sońǵy 4 jylda respýblıka boıynsha páter urlyǵynyń úshten birge tómendegeni baıqalady. Osylaısha, sońǵy 11 aıynyń qorytyndysy boıynsha 30 myńǵa jýyq páter urlyǵy tirkelgen. Bul byltyrǵy jyldyń osyndaı kezeńimen salystyrǵanda 7,5 paıyzǵa tómen. Mundaǵy qylmystyń jartysy ashylmaı qalǵan. 6733 qylmysker ustaldy», - deıdi ol.
ІІM ókiliniń aıtýynsha, jalpy sany 150 adamnan turatyn 43 qylmystyq top ustalǵan.
«Osylaısha, Almaty qalasynda jyldyń basynan beri Almaty, Shyǵys-Qazaqstan jáne Pavlodar oblystarynyń turǵyndarynan turatyn 7 qylmystyq top quryqtaldy. Olar 31 páter urlyǵyn jasaýmen áshkerelengen. Nur-Sultan, Almaty, Shymkent, Aqmola, Aqtóbe, Batys-Qazaqstan, Qaraǵandy Shyǵys-Qazaqstan oblystarynan «ury-gastrolerlerden» turatyn jáne jalpy alǵanda 50 páter urlyǵyn jasaǵan 9 qylmystyq toptyń qylmystyq áreketi áshkerelendi», - deıdi ol.
Mysaly, Nur-Sultan qalasynda quramyna boıjetken qyz da kirgen 4 adamnan turatyn top ustalǵan. Olar biryńǵaı shet jatqan aýdandarda áreket etken. Mańdaıshasy bar úılerdi tańdap, ashyq turǵan jelkózder arqyly nemese plastık terezelerdi yǵystyrýmen páterge engen. Osy oraıda qyz ben jigit ǵashyq juptyń rólin oınap, saqtyq sharasy úshin kireberiste turǵan. Olardyń 12 páter urlyǵyn jasaǵany dáleldengen.
