Páter urlyǵymen aınalysqan qylmystyq top ustaldy
ALMATY. QazAqparat - Almatyda páter tonaýmen aınalysqan qylmystyq top ustaldy, dep habarlaıdy QazAqparat tilshisi.
Úsh adam páterlerge kirip qundy zattardy urlaǵan. Olardyń 27 qylmystyq epızodqa qatysy bary anyqtaldy.
«Urlyqqa jumysqa baratyndaı bolyp shyqqan, tańerteń jınalyp, aýlalardy aralap, terezelerdi, kópqabatty úılerdiń kireberisterin qaraılap júrgen. Kóbinese adamdardyń basym bóligi jumysta bolady. Olar domofondy basqan, eger eshkim jaýap bermese, ishke kirip, kilt tańdaý arqyly esikti ashyp, qundy zattardy jymqyryp ketetin bolǵan. Ekeýi urlyq jasaǵan kezde, úshinshisi «qonaqtardyń» kelip qalýynan saqtandyryp, tómengi qabatta kútip turǵan. Jedel-izdestirý sharalary kezinde úsheýi de ustaldy. Olardan zattaı aıǵaqtar: aqsha, gadjetter, qujattar, bank kartalary bar ámııandar tárkilendi», – dedi Almaty qalasy PD bastyǵynyń orynbasary Berik Ábilbekov.
Qazirgi ýaqytta osy top músheleri PD ýaqytsha ustaý ızolıatoryna qamaldy. QR QK-niń 188-baby 3-bóligi (Asa iri mólsherde jasalǵan urlyq) boıynsha sotqa deıingi tergeý amaldary júrgizilýde. Kúdiktilerdiń biri 32 jastaǵy jigit buryn sottalǵan. Onyń sybaılastary - 25 jáne 34 jastaǵy eki adam qylmystyq jaýapkershilikke tartylmaǵan. Biraq, adal jolmen aqsha tapqysy kelmegen qylmyskerler zań aldynda birdeı jaýap beredi«, – dedi polkovnık Ádilbekov.
